DILI, 24 janeiru 2025 (TATOLI)—Ministru Defeza, Donaciano Costa Gomes “Pedro Klamar Fuik, hateten, tinan ne’e, Ministériu Defeza (MD) prioriza projetu infraestrutura militár haat.
“Foin daudaun Ministru Defeza partisipa iha reuniaun Konsellu Administrasaun Fundu Infraestrutura relata projetu Ministériu Defeza nian ne’ebé sei hala’o iha tinan ne’e iha haat,” Klamar Fuik hateten iha nia intervensaun iha ámbitu serimónia entrega ekipamentu ba Komandu F-FDTL ne’ebé realiza iha Kuartél Jenerál F-FDTL, Fatuhada, Dili, sesta ne’e.
Nia dehan, projetu haat referidu kompostu husi konstrusaun Portu Komponente Navál Hera, infraestrutura militár Beduku lokalizadu iha postu administrativu Bazartete, munisípiu Liquiçá, infraestrutura militár iha área Dama-Laran ne’ebé lokaliza iha postu administrativu Atabae, munisípiu Bobonaro, baze operasionál inklui rezidénsia ba militár sira.
Tuir governante ne’e katak indemnizasaun ba komunidade afetada sira ba infraestrutura militár iha Beduku, Ministériu Defeza rezolve ona.
“Ita-boot sira hatene orsamentu ne’ebé prevee ba Ministériu Defeza no Forsa Defeza nian ba tinan ne’e iha millaun $45. Orsamentu ida-ne’e atu sustenta Ministériu Defeza no Forsa Armada ho estrutura ne’ebé relevante iha Ministériu Defeza nia okos,” nia konklui.
Jornalista: Natalino Costa
Editór: Xisto Freitas da Piedade
