SUÍÇA, 23 janeiru 2025 (TATOLI) – Prezidente repúblika, José Ramos Horta husu ba governu atu aselera lalais aprovasaun ba lei foun protesaun investimentu nian hodi bele fó garantia ba investidór sira atu bele investe iha Timor-Leste (TL).
“Timor tenki iha kondisaun. Ha’u ko’alia tinan ida resin ona ho matenek-na’in sira iha governu kona-ba aprova lais lei foun protesaun investimentu no double taxation. Se di’ak liután ita bele kria tribunál espesiál ida, arbitration para rezolve kestaun disputa kontratuál,” PR Horta hateten ba Agência TATOLI, iha sesaun ikus ba enkontru anuál Fórum Ekonómiku Mundiál, iha otel Seehof, Davos, Suiça, kinta ne’e.
Tuir prezidente katak iha investidór barak husi nasaun oioin hakarak atu investe iha TL maibé sira hakarak uluk maka ita-nia mekanizmu legál, justisa, tribunál iha rezolve kestaun intendidade, independénsia, parserialidade tuir regra internasionál nian.
“Investidór sira ha’u kontakta lubuk ida, husi Korea, Xina, Europa no seluktan i sira husu investion protection law, double taxation i justisa, tribunál arbritajen maibé tanba seidauk klaru hodi ida-ne’e mak trava investimentu iha Timór,” xefe Estadu relata.
Lembra fali mós katak antes ne’e mós Parlamentu Nasionál (PN) liuhusi Komisaun D trata asuntu ekonomia no dezenvolvimentu propoin ba Governu atu halo revizaun ba lei investimentu no lei sosiedade komersiál.
Notísia relevante: https://tatoli.tl/2024/02/01/pn-propoin-halo-revizaun-lei-investimentu-no-sosiedade-komersial/
Jornalista: Jogerjo Guterres
Editór: Rafael Ximenes de A. Belo
