VIQUEQUE, 26 janeiru 2025 (TATOLI)—Komisaun Nasionál Eleisaun (CNE, sigla portugés) Viqueque la rejista irregulraidade durante eleisaun suku foun no apuramentu iha suku Macadique de Baixo no suku Macadique Uaitame, postu administrativu Uatulari, munisípiu Viqueque, iha sábadu-domingu (25-26 janeiru 2025) ne’e.
“Ita moris iha nasaun demokrátiku, ita hotu-hotu tenke kumprimenta regra demokrátika ninian, atu hetan pozisaun sai xefe, liuhusi prosesu votasaun hodi reprezenta komunidade iha suku. Ba realizasaun eleisaun ba suku Macadiaque de Baixo no Macadique Uaitame la’o di’ak, lai mosu poblema ruma durante eleisaun, tanba komtribui másimu husi komunidade suku rua nian,” Komisáriu CNE destakadu munisípiu Viqueque, Olavio da Costa Monteiro Almeida, hateten iha suku Macadique de Baixo, ohin.
Komisáriu CNE ne’e hatutan, eleisaun suku ne’ebé la’o di’ak ka la di’ak CNE mak halo supervizaun ba eleisaun hanesan daudaun iha suku rua ne’e.
“CNE halo observasaun ba eleisaun komunitária no supervizaun. Tanba ne’e, ami CNE presenza iha suku rua ne’e hodi observa ba prosesu eleisaun tuir regra eleisaun nian iha suku rua. Ha’u hato’o parabéns ba povu suku rua ne’ebé horisehik partisipa iha eleisaun to’o públika rezultadu eleisaun la’o susesu,” nia dehan.
Tuir dadus, suku Macadique Uaitame nia aldeia hamutuk neen (6) kompostu husi aldeia Bubulita ne’e eleitór mane 115 no feto 124 ho totál eleitór hamutuk 239 (24%); Borubai iha eletór mane 46 no feto 49 ho totál eleitór hamutuk 95 (10%); Digamasi iha eleitór mane 34 no feto 44 ho totál eleitór hamutuk 95 (8%).
Aldeia Luruboru iha eletór mane 68 no feto 75 ho totál eleitór hamutuk 143 (14%); Matadalan iha eleitór mane 22 no feto 33 ho totál eleitór hamutuk 55 (6%); Queturai iha eleitór mane 37 no feto 40 ho totál eleitór 77 (8%) ho totál eleitór hamutuk 688.
Entretantu, suku Macadique De Baixo nia aldeia hamutuk hitu (7) ne’ebé kompostu husi aldeia Betulari iha eleitór mane 167 no feto 183 ho totál eleitór hamutuk 350 (35%); Gomioru iha eleitór mane 106 no feto 121 ho totál eleitór 227 (23%); Koquilako iha eleitór mane 57 no feto 64 ho totál eleitór hamutuk 141 (14%).
Aldeia Lacarate iha eleitór mane 100 no feto 112 ho totál eleitór 212 (21%); Lau-Uma iha eleitór mane 116 no feto 120 ho totál eleitór 236 (24%); Lutugia iha eleitór mane 118 no feto 111 ho totál eleitór hamutuk 229 (23%); Ossolari iha eleitór mane 107 no feto 123 ho totál eleitór hamutuk 230 (23%), ne’ebé totál eleitór iha suku rua ne’e hamutuk 1.625 (163%).
Entretantu, eleisaun suku iha suku Macadique de Baixo no Macadique Uaitame haala’o eleisaun iha sábadu (25/01) iha tuku 09h00 dadeer no ramata eleisaun iha tuku 15h00. Prosesu apuramentu hala’o iha domingu (26/01) hahú iha tuku 08h00 to’o tuku 14h00 kontinua entrega ba administradór postu administrativu Uatulari.
Jornalista : Vitorino Lopes da Costa
Editór : Cancio Ximenes
