STAE konklui eleisaun suku iha Macadique Uaitame
VIQUEQUE, 26 janeiru 2025 (TATOLI)—Sekretáriadu Tékniku Administrasaun Eleitorál (STAE) konklui eleisaun komunitária ba suku Macadique Uaitame, postu administrativu Uatulari, munisípiu Viqueque.
Diretór STAE munisípiu Viqueque, Humberto Fernades, hateten eleisaun komunitária ba suku Macadique Uaitame nian konklui ho kandidatu xefe suku na’in-rua (2) ne’ebé kompostu husi númeru sorteu dahuluk Anibal Fernandes no kandidatu númeiru sorteu daruak José Pinto Soares kompete iha eleisaun ne’ebé realiza sábadu (25/01) ne’ebé kompete iha eleisaun suku Macadique Uaitame ne’e konklui.
“Nune’e, eleisaun ba xefe suku Macadique Uitame ne’ebé ita realiza sábadu (25/01) horisehik, ita konklui domingu (26/01) ohin ho halo apuramentu ikus ne’ebé halo iha sembleia sede suku Macadique Uaitame. Rezultadu eleisaun ne’e ita-nia kandidatu númeiru sorteiu daruak Jose Pinto Soares mak eleitu ho votu 254 (56,57%). Enkuantu, kandidatu númeru sorte (1) hetan votu 190 (42,31%),” Humberto Fernades, hateten ba Agência Tatoli, iha postu Uatulari, ohin.
Nune’e, nia dehan, apuramentu eleisaun suku finál ona no komunidade husi suku Macadique Uaitame ne’ebé iha aldeia neen (6) fó ona konfiansa ba José Pinto Soares hodi lidera suku referida.
“Daudaun ne’e, xefe ba suku Macadique Uaitame iha ona, hein sei kompleta tán estrutura hanesan lia-na’in no xefe juventude feto no mane hodi servisu hamutuk ho ita-nia xefe suku,” nia subliña.
Iha fatin seluk, Xefe suku Macadique, Afonso dos Reis, haktuir realizasaun eleisaun iha suku Macadique Uaiteme horisehik ne’e la’o ho hakmatek tanba komunidade koopera ho di’ak.
“Prosesu eleisaun ne’ebé horisehik la’o iha suku Macadique Uaitame, ha’u akompaña iha sentru votasaun sira la’o di’ak no la mosu problema ka irregularidade ruma to’o iha apuramentu ohin ne’ebé hla’o iha suku Macdique Uaitame. Ba suku Macadique Uaitame iha ona lideransa suku hodi lidera no kria dezenvolvimentu iha futuru oin mai,” nia hateten.
Tuir dadus totál eleitór husi suku Madique Uaitame hamutuk 688, kompostu husi aldeia neen hanesan aldeia Bubulita ho eleitór 239 (24%) kompostu husi mane 115 no feto 124, aldeia Borubai ho eleitór 95 (10%) kompostu husi mane 46 no feto 49, aldeia Digamasi ho totál eleitór 95 (8%) kompostu husi mane 34 no feto 44.
Aldeia Luruboru ho eleitór 143 (14%) kompostu husi mane 68 no feto 75, aldeia Matadalan ho eleitór 55 (6%) kompostu husi mane 22 no feto 33 no aldeia Queturai ho eleitór 77 (8%) kompostu husi mane 37 no feto 40.
Entretantu, rezultadu apuramentu eleisaun komunitária ne’ebé realiza iha suku Macadique Uaitame entrega ona ba adiministradór postu Uatulari henesan na’in ba realizasaun eleisaun komunitária.
Jornalista : Vitorino Lopes da Costa
Editór : Cancio Ximenes
