COVALIMA, 27 janeiru 2025 (TATOLI) – Kandidatu Traballadór Australia na’in-305, mak daudaun ne’e kompleta ona sira-nia dokumentu, iha Sekretariu Estadu Profesionál no Empregu (SEFOPE), iha Munisípiu Covalima.
“Tuir dadus kandidatu traballadór ne’ebé atu kompleta sira-nia dokumentu hamutuk na’in-658. Husi númeru ne’e, daudaun ne’e, ita atende ona kandidatu Traballadór Australia na’in-305 mak submete sira-nia dokumentu mai iha SEFOPE Covalima”, Diretór SEFOPE Covalima, Stefanus Segundo Manek, relata dadus ne’e ba jornalista sira, iha nia serbisu fatin Tabakolok, ohin.
Dirijente SEFOPE Covalima ne’e dehan, SEFOPE nafatin fó atendementu ba kandidatu traballadór sira ne’ebé mak kompleta sira-nia dokumentu tanba kandidatu traballadór sira ne’e balun serbisu hela iha instituisaun sira nune’e sira iha tempu mak kompleta dokumentu.
Dokumentu ne’ebé mak kandidatu traballadór presiza atu kompleta mak hanesan, Sertidaun RDTL, Kartaun Eleitorál no sira na’in-rasik mak presiza kompleta dokumentu tanba sei hasai foto nune’e empregradór atu haree traballadór sira-nia fíziku nune’e labele haruka família mak atu kompleta dokumentu tanba sistema la simu.
SEFOPE Covalima halo atendementu ba kandidatu traballadór Austr]alia bazeia ba simu orientasaun husi SEFOPE nasionál tanba kandidatu sira ne’ebé kompleta dokumentu hetan ona númeru referénsia no rejista ona iha sistema hein empreza sira presiza sira.
Kandidatu traballadór ne’ebé mak kompleta sira-nia dokumentu ne’e tanba foin lalais ne’e sira tuir sira/nia valór sufisiente, poor ho verry poor ne’e sira tuir fali ona teste iha nasionál no iha ona númeru referénsia, tanba ne’e mak presiza atu kompleta sira-nia dokumentu iha munisípiu.
“Kandidatu ne’ebé kompleta sira-nia dokumentu ita haree sira ho idade 40 ba leten mós iha, maibé ita seidauk defini loloos ho sira-nia idade, tanba daudaun-ne’e sira sei iha prosesu rejistasaun iha sistema,” nia hateten.
Fó hanoin fali katak, iha loron 02 marsu 2024 ne’e, Sekretaria Estadu Formasaun Profesionál no Empregu (SEPFOPE) fó teste lian inglés ba kandidatu traballadór na’in-3184 ne’ebé konkorre vaga liuhusi online, tuir prosesu Pacific Australian Labour Mobility (PALM) atu ba servisu iha Austrália.
Tuir dadus kandidatu traballadór ne’ebé konkorre vaga liuhusi sistema online, iha territóriu hamutuk rihun/51. Husi númeru ne’e, kandidatu traballadór husi Munisípiu Covalima, kandidatu traballadór hamutuk 3,184 ne’ebé mak tuir teste.
Jornalista: Celestina Teles
Editór :Rafael Ximenes de A. Belo
