MAPPF lansa manuál estensaun agríkola hodi apoia serbisu iha terrenu
DILI, 27 Janeiru 2027 (TATOLI) – Ministériu Agrikultura, Pekuária, Peska no Floresta (MAPPF) halo lansamentu ba manuál estensaun agríkola (MEA) hodi apoia serbisu iha terrenu no distribui uniforme ba estensionista sira iha munisípiu.
Ministru Agrikultura Pekuária, Peska no Floresta, Marcos da Cruz, hateten objetivu husi lansamentu manuál no entrega uniforma serbisu ba estensionista agríkola iha munisípiu 12 no Rejiaun Administrativa Espesiál Oé-Cusse Ambeno (RAEOA) ne’e importante ba dezenvolvimentu setór agrikultura, pekuária, peska no floresta ninian.
“Tanba manuál ne’e hakerek oinsá mak ita bele aplika prátika agrikultura ne’ebé di’ak hodi bele aumenta produsaun iha rai-laran”, Marcos da Cruz dehan ba jornalista sira iha Comoro, ohin.
Nia realsa kona-ba uniforme ne’e, sei fahe ba estesionista sira iha munisípiu hotu hodi utiliza hala’o serbisu iha terrenu, tanba sira mak hanesan tékniku ne’ebé treinadu hodi transforma prátika agrikultura di’ak ne’e ba to’os-na’in sira atu halo produsaun hare iha rai-laran.
Uniforme ne’ebé ohin disponibiliza ne’e mak xapeo, botas no kamiza. Ida-ne’e apoia estesionista hala’o serbisu atu ema bele koñese sira liuhusi uniforme ne’e. Ha’u husu ba diretór agrikultura munisípiu sira tenke sosializa manuál ne’ebé iha to’o agrikultór sira, nune’e bele komprende bainhira halo produsaun [agríkola]”, govenante ne’e dehan.
Osamentu ne’ebé prevee ba uniforma ne’e hamutuk rihun $70 husi verba tinan kotuk nian hodi fó ba estesionista hamutuk 300-resin. “Maibé husi númeru ne’e [estensionista] balun idade ona. Ministériu Agrikultura sei serbisu hamutuk ho Ministériu Administrasaun Estatál oinsá atu aumenta tan rekursu umanu”.
Iha fatin hanesan, Diretór-Jerál Agrikultura, Kafé no Planta Industriál, Martinho Laurentino Soares, hateten manuál ne’e hakerek kona-ba área agrikultura, pekuária, peska no floresta nian.
“Husi manuál ne’e oinsá halo produsaun ne’ebé di’ak ba hare, pekuária nian, peska nian oinsá haki’ak ikan ho kualidade, ba floresta nian oinsá halo jestaun ne’ebé di’ak hodi kuidadu no proteje ambiente”, nia dehan.
Reprezentante Embaixada Austrália husi Departamentu Asuntu Esternu (DFAT, sigla inglés), Fabia Shan, hodi Governu Ausrália nia naran agradese ba MAPPF, tanba ohin halo lansamentu ba MEA ida ne’ebé hetan revizaun husi ekipa TOMAK dezde 2022.
Nia esplika manuál ne’e sei ajuda hodi asegura serbisu estensionista nian hodi reflete ba nesesidade komunidade agrikultór sira. “Espera katak manuál ne’e sei distribui ba territóriu hotu no bá ajénsia no organizasaun hirak ne’ebé serbisu iha setór xave ne’e. Buat ne’ebé ita presiza esforsu mak sosializasaun ba manuál ne’e iha nivel nasionál no munisipál ba setór xave sira ne’ebé sei implementa manuál ne’e. Ami nafatin apoiu programa sosializasaun ba manuál ne’e to’o munisípiu selesionadu sira”, adiata.
Diretór Serbisu Agrikultura Lautém, Albertino Jerónimo, hateten nia parte agradese ba Governu nia apoiu ba kria munuál no uniforme ba estesionista sira, tanba liuhusi ida-ne’e sei ajuda di’ak liután serbisu iha terrenu.
“Lautém iha totál suku 34, maibé foin suku 25 mak iha estesionista no seluk seidauk, nune’e hanoin tinan oin Governu tenke tau orsamentu atu halo rekrutamentu ba estesionista sira hodi destaka tan ba suku sira ne’ebé seidauk”, nia dehan.
Jornalista: Arminda Fonseca
Editora: Maria Auxiliadora
