VIQUEQUE, 27 janeiru 2025 (TATOLI)–Vigáriu parokia Nossa Senora de Fátima Uatulari, Pe. Cimpliu Bau Mali, SVD, enkoraja estudante Ensinu Sekundáriu Tékniku Vokasionál (ESTV) Kalo-Heda, postu Uatulari, munisípiu Viqueque tenke badinas aprende no estuda tanba estudante sira mak sai fini ba nasaun Timor Leste.
“Iha anu letivu foun ba tinan 2025, ita tenke prepara aan didiak hodi sai nu’udar estudante, buka hatene siénsia sira-ne’ebé profesór sira prepara. Ambiente edukasaun mak fatin kari fini ne’ebé di’ak ba moris nasaun no igreja nian. Tan ne’e, estudante sira aproveita tempu sira-ne’ebé aprende iha eskola no estuda, estuda tanba imi maka fini nasaun nian,” Pe. Cimpliu Bou Mali, SVD, hateten iha misa agradesimentu ba ano letivu 2025, iha ESTV Kalo-Heda, Mauselok, ohin.
Na’i lulik ne’e husu, estudante ESTV Kalo-Heda nafatin husu ajuda ba Na’i atu bele tulun estudante sira hodi partisipa iha sirkulasaun edukasaun la’o ho di’ak tuir misaun no vizaun eskola nian.
“Tanba ne’e, ba estudante sira nia kna’ar mak estuda la’ós hadau pasa iha ezame nasionál, maibé estuda hodi hatene tanba ita estuda hada’u pasa ezame, depois liu tiha ezame ita mós haluha ona siénsia. Tan ne’e, oras eskola ne’e imi (estudante) nia fatin mak iha edifísiu eskola la’os ba fali fatin seluk,” nia dehan.
Aleinde ne’e, nia hateten, kna’ar profesór sira-nian mak hanorin estudante no sai hanesan matadalan ne’ebé sai vokasaun ida hodi dedika aan tanba profesór mak sai eroi ba edukasaun.
“Atu mai aprende no hanorin iha ESTV Kalo-Heda tenke sente pertense kona-ba kna’ar, responsável no obidiente. Maske ita mai iha mundu edukasaun ESTV Kalo-Heda no kareira ne’ebé la hanesan, maibé Na’i husu ba ita hodi kompleta malu iha mundu edukasaun nain,” nia hateten.
Iha fatin hanesan, Diretór ESTV Kalo-Heda, Zainal Abidin, haktuir ESTV Kalo-Heda inisiativa husu misa agradesimentu ba ano letivu 2025 ne’e hodi hametin espíritu estudante sira-nian.
“Tanba dala barak ita-nia estudante sira kria problema entre joven sira, tanba ne’e liuhusi misa ida-ne’e bele hetan morál hodi muda sira-nia pensamentu sira hodi aprende no estuda iha eskola.
Tanba ne’e, kada tinan molok hahú prosesu apredizajén ne’e, ami realiza uluk misa agradesementu iha eskola hafoin ami realiza prosesu ensinu apredizajen,” nia subliña.
Tuir dadús, estudante sira-ne’ebé eskola iha ESTV Kalo-Heda, iha klase 1 to’o klase 3 hamutuk na’in-127 no profesór hamutuk na’in-15.
Iha misa agradesementu ESTV Kalo-Heda nian ne’e, partisipa husi autoridase lokál, profesór, estudante, veteranu no komunidade.
Jornalista : Vitorino Lopes da Costa
Editór : Cancio Ximenes
