COVALIMA, 27 janeiru 2025 ( TATOLI)- Servisu Saúde Munisípiu (SSM), Covalima nafatin enfrenta problema menus rekursu umanu atu koloka ba postu saúde sira ne’ebé estabelese ona iha Covalima.
Diretór Servisu Saúde Covalima, Domingos Sequeira, dehan, Saúde Covalima nafatin menus rekursu umanu maibé daudaun ne’e funsionáriu ne’ebé halo rekrutamentu iha 2024 sei asina hela sira-nia kontratu.
“Bazeia ba mapamentu ita nafatin menus rekursu umanu. Bainhira 2025 ne’e iha planu halo tan rekrutamentu foun, ita agradese . Ita presiza barak liu mak médiku, enfermeira, parteira no saúde públiku atu koloka ba postu saúde sira”, Domingos Sequeira, dehan ba TATOLI, iha AMC, ohin.
Tuir dadus, daudaun ne’e Ministériu Saúde (MS) estabelese ona Postu saúde 24, husi númeru postu saúde balun seidauk mak seidauk koloka médiku, nune’e servisu saúde liu koloka enfermeiru ho parteira sira.
Bazeia ba regra iha postu saúde ida presiza koloka pesoál saúde na’in ualu, mak hanesan, médiku na’in-ida, enfermeiru, parteira, tékniku aliadu, laboratóriu, farmasista no saúde públika atu halo atendementu ba komunidade sira .
Ezekutivu ne´e informa katak daudaun ne´e sei menus rekursu umanu no seidauk atinji alvu. “Maibé, ita hakaas aan hela iha 2030 ita esforsu nune’e bele kompleta ona,” nia garante.
Rekursu ne’ebé mak presta servisu iha sentru saúde hitu mak hanesan, sentru saúde Fatululik koloka pesoál saúde hamutuk 21 kompostu husi médiku na’in-ida, enfermeiru na’in-haat, parteira rua, analista ida, farmasista ida no seluktan rua.
Sentru saúde Fatumea koloka pesoál saúde 24 kompostu husi médiku ida, enfermeiru hitu, parteira rua, analista ida, farmasista ida, asistente ida no seluk haat. Sentru saúde Fohorem koloka pesoál saúde 29. Husi númeru ne’e, médiku tolu, enfermeiru lima, parteira haat, analista ida, farmásia ida, asistente enfermeiru ida no seluk haat.
Sentru saúde Maucatar koloka pesoál saúde 41, kompostu husi médiku tolu,enfermeiru neen, parteira neen, analista ida, farmasista ida, asistente enfermeiru haat no seluk sia. Sentru saúde Suai hamutuk na’in-60, kompostu husi médiku ualu, enfermeiru 13, parteira 10, analista ida, farmasista ida, asistente enfermeiru lima no seluk hitu.
Sentru Saúde Tilomar koloka pesoál Saúde 36, kompostu husi médiku tolu, enfermeiru ualu, parteira lima, analista ida, farmasista rua, asistente enfermeiru ida no seluk haat no sentru saúde Zumalai koloka 4. Husi númeru ne’e, médiku lima, enfermeiru haat, parteira neen, analista ida, farmasista ida, asistente enfermeiru ida no seluk na’in sia.
Jornalista: Celestina Teles
Editór: Rafael Ximenes de A. Belo
