COVALIMA, 27 janeiru 2025 (TATOLI) – Sekretariu Estadu Formasaun Profesionál no Empregu (SEFOPE) , Covalima fó apoiu orsamentu ba grupu auto-empregu rua, iha 2024, hodi hadi´a sira-nia moris liuhusi loke negósiu ki´ik.
“Iha 2024 ne’e ita fó apoiu grupu auto empregu rua mak hanesan Grupu prodús Batako no loke alfaiati ne’ebé daudaun ne’e sira sosa ona materiál no submete ona relatóriu, tanba SEFOPE fó apoiu bazeia ba sira-nia atividade negósiu,” Diretór SEFOPE Covalima, Stefanus Segundo Manek, informa ba jornalista sira, iha edifísiu SEFOPE, Tabakolot, ohin.
Governu liuhusi SEFOPE fó apoiu orsamentu ba grupu auto-empregu rua ne’e hanesan foku ba prodús Batako apoiu hamutuk $9500 no ba grupu auto-empregu loke alfaiati orsamentu hamutuk rihun tolu-resin ne’ebé daudaun ne’e kompleta ona sira-nia dokumentu, submete ona relatóriu no hala’o ona sira-nia atividade negósiu.
“Antes ita fó apoiu ita sei haree bazeia ba sira-nia atividade bainhira sira submete de’it proposta la iha atividade ita la fó apoiu durante ne’e no tuir ami-nia monitorizasaun grupu auto-empregu ne’ebé mak hala’o atividade negósiu la’o di’ak, tanba hanesan grupu ne’ebé loke alfaiati ema ne’ebé iha esperénsia,” nia esplika.
Prosesu atu fó apoiu ba grupu auto empregu, grupu sira submete uluk sira-nia proposta atividade negósiu ba SEFOPE Munisípiu, hafoin SEFOPE halo debate hodi analiza proposta sira ne’ebé mak merese atu pasa no se mak merese la pasa.
Hafoin fó apoiu SEFOPE sei halo monitorizasaun bainhira atividade la la’o sei foti fali sasan ne’ebé mak Governu apoiu ba grupu sira uza osan Estadu sosa sasan, hodi loke atividade negósiu ki´ik, maibé agradese durante ne’e SEFOPE fó la foti sasan tanba atividade negósiu la’o di’ak.
Tan ne’e, iha 2025 SEFOPE nafatin fó apoiu no daudaun ne’e fó sai ona avizu ba grupu sira ne’ebé mak iha interrese atu submete proposta ba área sira hanesan grupu haki´ak modo, loke ofisina no seluktan. Maibé, SEFOPE la atende proposta ne’ebé foku atu haki´ak animál sira.
Xefe Grupu Alfaiati Funarjofrensi, Bendita Cardoso Barros, rekoñese hetan apoiu fundu husi Sekretariu Estadu Formasaun Profesionál no Empregu (SEFOPE) hodi loke negósiu ki´ik hanesan loke alfaiati maibé loron bai-bain ema na’in-ida ka rua de’it mak suku roupa.
“Ami atende ema barak bainhira iha tempu natal ho tinan foun mak ema barak antri no ita mak baruk atu atende ema. Grupu Alfaiati ho nia membru na’in tolu husi númeru ne’e na’in ida mak ativa no rua seluk la ativa atu halo serbisu,” nia hatete.
Orsamentu ne’ebé SEFOPE apoiu gropu alfaiati hamutuk $ 3,543 ne’ebé hodi sosa mákina suku roupa tolu kompostu husu mákina elektrika rua , makina suku roupa manuál ida , mákina atu obras roupa ida no sasan armáriu vidru.
Tan ne’e xefe Grupu hato’o agradese ba Governu ne’ebé fó apoiu orsamentu nune’e sira bele loke sira-nia negósiu kiik hodi bele sustenta família uma laran.
Jornalista: Celestina Teles
Editór: Rafael Ximenes de A. Belo
