DILI, 28 Janeiru 2025 (TATOLI) – Konsellu Kombatente Libertasaun Nasionál (CCLN-sigla portugés) Manufahi simu kontestante ba lista editál rihun rua-resin.
“Loroloron kontestante foti formuláriu reklamasaun nian la’o hela, ne’ebé kombatente kuaze rihun rua-resin mak foti formuláriu reklamasaun nian. Iha formuláriu ne’e kontesta oioin, balun kontesta ba sira-nia eskalaun rasik, balun fali kontesta kombatente balun ne’ebé ninia eskalaun la tuir nia partisipasaun. Tanba dehan la partisipa iha funu maibé ninia eskalaun sae maka’as liu no iha balun tan kontesta kombatente ne’ebé nia naran sai iha lista editál maibé uluk koordena no koopera ho inimigu”, Prezidente Kombatente Libertasaun Nasionál, Tobias Amaral Magno, dehan ba Tatoli, via telefone, tersa ne’e.
Prezidente CCLN Manufahi, dehan lista editál ne’e la’o tuir de’it orientasaun hosi MAKLN, tanba ne’e, karik iha protestu ruma ba eskalaun entaun priénse formuláriu reklamasaun.
“Ami Konsellu Kombatente Manufahi kumpre de’it orientasaun no ita dehan ba sira katak ami la’o tuir de’it orientasaun Ministru Asuntu Kombatente Libertasaun Nasionál, Gil da Costa Monteiro “Oan Soru”, katak se mak la satisfeitu ho lista editál mai foti formuláriu reklamasaun, hodi kontesta fila-fali”, nia dehan.
Totál lista editál ba Kombatente Manufahi hamutuk 5177, Manufahi ema ida de’it mak ho eskalaun 20a24 maibé ema ida-ne’e ita la koñese. Depois seluk ne’e mesak iha naun Kombatente inklui ho sira-ne’ebé tama iha eskalaun 8a14, 15a19, 3a7 no 0a3.
“Ami sei entrega lista reklamasaun ne’e depois loron 60, ida-ne’e automatikamente lori ba nasionál. Nune’e biban ne’e hakarak husu ba Kombatente ka públiku katak kuandu la satisfeitu ho lista editál taka sai ne’e, ne’ebé la tuir sira-nia partisipasaun mak dalan foti formuláriu reklamasaun iha Konsellu Kombatente Manufahi hodi priénse”, nia remata.
Totál lista editál kombatente rejistadu hamutuk 92.591 iha territóriu hosi totál 124.782.
Iha Estatutu Kombatente Libertasaun Nasionál, lei númeru 3/2006 iha artigu 13 ne’e hateten kona-ba rejistu kualidade husi Kombatente Libertasaun Nasionál. MAKLN rasik prevee ona millaun $99 ba Kombatente Libertasaun Nasionál rejistadu tinan 2009.
Jornalista : Osória Marques
Editór : Zezito Silva
