COVALIMA, 28 janeiru 2025 (TATOLI) – Raes Hadomi Timor Oan (RHTO), Covalima fasilita trata dokumentu hanesan sertidaun RDTL no Billete Identidade (BI) ba ema ho defisiénsia na´in-ida husi postu Maucatar, munisípiu Covalima iha Servisu Munisipál Rejistu Konservatóriu Notariadu (SMRN) Covalima.
Pontu Vokál RHTO, Rozito Amaral esplika, kada tinan Organizasaun RHTO sempre fasilita ema ho defisiénsia atu trata sira-nia dokumentu hanesan Billete identidade (BI) no sertidaun RDTL no dokumentu sira seluk nune’e sira bele asesu subsídiu husi Governu.
“Iha 2025 ne’e RHTO foin mak fasilita ema ho defisiénsia na’in-ida atu trata sira-nia dokumentu hanesan Billete Identidade (BI) iha Servisu Munisipál Konservatóriu Rejistu Notariadu Covalima”, Rozito Amaral, relata ba TATOLI iha resintu edifísiu Notariadu Bairru Rompe, ohin.
Programa RHTO fasilita ema ho defisiénsia trata dokumentu kada tinan ida ema ho defisiénsia hamutuk na’in-12, tanba fasilita ba ema ho defisiénsia ho fazeada nune’e kada fulan ida ba ema na’in-ida de’it.
RHTO fasilita ema ho defisiénsia, trata dokumentu ne’e, kada ema na’in ida fó apoia osan transporte $ 75 ho nune’e iha 2025 osan transporte atu fó apoiu ba ema ho defisiénsia na’in-12 ne’e hamutuk $ 900.
Pontu vokál ne’e klarifika, Programa RHTO fasilita osan transporte ba ema ho defisiénsia hodi trata sira-nia dokumentu implementa iha postu Administrativu hitu ne’ebé hahú husi postu administrativu Maucatar, Suai ,Tilomar , Fatululik, Fatumea, Fohorem no Zumalai.
Iha sorin seluk Ema ho defisiénsia , Calisto Amaral sente kontente tanba Organizasaun Raes Hadomi Timor-Oan iha nia programa fasilita ema ho defisiénsia sira atu trata dokumentu sira hanesan Sertidaun RDTL, BI no seluktan.
“Ohin ha’u mai iha edifísiu Notariadu Covalima RHTO mak fasilita osan transporte mai ha’u atu trata ha’u-nia dokumentu hanesan Sertidaun RDTL ho Billeti Identidade nune’e ha’u bele hetan apoia insetivu husi Governu,” nia reforsa.
Fó hanoin fali katak, RHTO mak organizasaun nasionál ida ba ema ho defisiénsia iha Timor-Leste, ne’ebé iha membru liu 600, inklui ema ho tipu defisiénsia oin-oin ne’ebé iha Dili-Bekora loron 28 agostu 2006.
RHTO nia misaun mak atu halo advokasia efetivamente ba direitu husi ema ho defisiénsia sira no atu fasilita inkluzaun ba ema hotu-hotu ho defisiénsia iha sosiedade.
RHTO nia vizaun Sosiedade inkluziva ida ba ema hotu-hotu, ne’ebé ema hotu-hotu ho defisiénsia goza sira-nia direitu umanu tomak, hetan kbiit atu alkansa sira-nia aspirasaun, no partisipa totalmente no igualmente iha Timor-Leste nia sosiedade.
RHTO serbisu ho governu, parseiru iha setór defisiénsia, organizasaun públika no privada sira, sosiedade sívil, no setór dezenvolvimentu iha jerál, atu bele apoia no hadi’ak inkluzaun no asesu ba direitu umanu hosi Ema ho Defisiénsia.
Jornalista: Celestina Teles
Editór: Rafael Ximenes de .A Belo
