VIQUEQUE, 28 janeiru 2025 (TATOLI)-Koodenadór Eletrisidade de Timor-Leste, Empreza Públika (EDTL,E.P) munisípiu Viqueque, Ernesto Sarmento, klarifika ahi eletrisidade ne’ebé mate iha postu Uatulari kauza husi ai monu iha fiu leten.
“Ha’u hakarak aprezenta ba públika tomak katak ahi eletrisidade ne’ebé mate horseik dadersan ne’e ai hale mak monu iha fiu leten, iha parte Lauai, suku Fatudere, postu Viqueque. Ho ida-ne’e mak kauza ba ita-nia liña eletrisidade kotu hodi labele halo operasaun”, Koordendór EDTL,E.P ne’e, hateten ba Agência TATOLI, iha postu Viqueque, ohin.
Ho akontesementu ne’e, koordenadór ne´e dehan, EDTL,E.P halo prosesu iha lorokraik hodi foti ahi husi parte Bagua, postu Ilomar no postu Uatucarbau mai Uaitulari.
Nune’e iha tuku 8h00 kalan ahi lakan tiha, maibé iha tuku 9h00 ahi mate fila de’it.
“Ita-nia liña ne’ebé ai monu ba leten avaria distánsia kuaze 600 metru no poste (ai rin eletrisidade) ai monu iha leten kle´ur hotu, trafo iha poste leten monu hotu no fiu kotu. Nune’e agora daudaun ne’e ekipa tékniku EDTL,E.P iha dadersaan ne’e dezloka ona ba Lauai hodi halo manutensaun,” nia subliña.
Koodenadór EDTL Viqueque ne´e garante katakbainhira tékniku sira halo manutesaun ba fiu sira-ne’e hotu ahi lakan fila fali ona tanba ne’e ekipa EDTL,E.P sei esforsu hodi halo manutensaun ba avaria sira ne’e.
Tuir observasaun jornalista Agência Tatoli iha Lauai to’o tuku 7h00 kalan ekipa ramata manutensaun no ekipa tékniku sira kontinua hein iha fatin Lauai hodi hatama enerjia eletridade. Nune’e dadaun ne’e, ahi hahú lakan fila iha oras tuku 8h00 to’o agora ahi kontinua lakan.
Enkuantu, ahi eletrisidade mate horseik hahú husi suku Fatudere, Uma Uain Leten postu Viqueque Vila no suku Macadique, Matahoi, Uaitame, Afaloikai, Vesoru no Babulu husi postu Uatulari.
Notísia relevante:https://tatoli.tl/2025/01/27/negosiante-uatulari-preokupa-eletrisidade-mate-lakan/?
Jornalista : Vitorino Lopes da Costa
Editór : Rafael Ximenes de A. Belo
