PAM Ermera orienta funsionáriu tama serbisu tanba iha ajenda importante rua
DILI, 29 Janeiru 2025 (TATOLI) – Prezidente Autoridade Munisípiu Ermera, José Martinho dos Santos Soares, admite katak fó orden ba funsionáriu sira kontinua tama serbisu iha ámbitu toleránsia pontu ba selebrasaun tinan foun Xina nian, ne’ebé monu iha loron 29 Janeiru.
Nia dehan maske loron ohin Governu, liuhusi Konsellu Ministru deside toleránsia pontu, maibé autoridade munisípiu Ermera nia funsionáriu sira tama serbisu, tanba iha ajenda prinsipál rua mak inaugurasun uma ba Programa Nasionál ba Dezenvolvimentu Suku iha Atsabe no vizita Primeiru-Ministru, Xanana Gusmão, bá nia subar-fatin iha Humboe.
“Sim, hau mak fó duni orientasaun ba ha’u-nia funsionáriu sira atu tama serbisu hanesan saida mak hakerek ona iha karta ne’ebé espalla ona”, José Martinho hateten ba jornalista Tatoli via telefone, ohin.
Tuir karta ne’ebé fó sai, Prezidente Autoridade Ermera orienta ba entidade hotu ne’ebé la selebra Tinan Foun Xina nian atu tama serbisu hanesan baibain”.
Nia salienta katak orientasaun serbisu ne’e nia fó ba funsionáriu iha gabinete diretór, xefe departamentu no kargu xefia sira seluk.
Hodi hatutan maske vizita xefe Governu iha Ermera ne’e asuntu partikulár, maibe hanesan prezidente autoridade tenke antesipa karik primeiru-ministru hakarak halo vizita direta bá edifísiu Autoridade Munisipál Ermera maka funsionáriu sira bele simu.
“Ohin ne’e la’ós funsionáriu hotu tama, maibé funsionáriu gabinete no kargu xefia sira mak tama. Tanba ne’e, ha’u la’ós kontra desizaun Konsellu Ministru, maibé tanba kestaun sira ne’ebé ha’u koalia ne’e”, nia afirma.
Autoridade ne’e dehan ba asuntu ne’e, husi Ministériu Administrasaun Estatál mós kontaktu nia hodi informa katak ohin ne’e toleránsia pontu.
“Ha’u esplika ona ba ministériu kona-ba kestaun ida-ne’e no sira mós informadu, liuliu ha’u-nia intensaun fó orientasaun ba funsionáriu sira serbisu iha loron boot, tanba liga ho ajenda ne’ebé iha ona”, nia konklui.
Rekorde katak Konsellu Ministru fó toleránsia pontu iha loron 29 fulan-Janeiru 2025 ba okaziaun tinan foun Xina nian.
Vise-Ministru ba Asuntu Parlamentár, Adérito Hugo da Costa, antes ne’e dehan desizaun ne’e halo hodi respeita komunidade xineza sira-nia loron boot ne’e, hanesan halo ba relijiaun sira seluk, katóliku no musulmanu sira-nian.
“Ita respeita ba komunidade xineza sira-nia [loron], Konsellu Ministru konkorda fó toleránsia pontu ba loron boot ne’e. Toleránsia pontu ne’e ba atividade sira Ezekutivu nian ne’ebé bele halo serbisu sempre kontinua. Ein prinsípiu atendimentu tenke kontinua la’o iha períodu toleránsia pontu ne’e”, governante hateten foin lalais ne’e.
Jornalista: Natalino Costa
Editora: Maria Auxiliadora
