iklan

JUSTISA, HEADLINE

Tribunál fó liberdade kondisionál ba AC hafoin kumpre metade pena

Tribunál fó liberdade kondisionál ba AC hafoin kumpre metade pena

Tribunal Judicial de Primeira Instancia de Dili. Imajen Tatoli/Egas Cristovão

DILI, 29 Janeiru 2025 (TATOLI) – Tribunál Judisiál Primeira Instánsia Dili (TJPID), liuhusi Juiza Prosesu Ana Paula Fonseca hasai, ohin, mandu hodi fó liberdade kondisionál ba rekluzu ho inisial AC hafoin kumpre metade pena iha prizaun.

AC antes ne’e envolve, iha 2020, krime abuzu sesuál kontra menór, nune’e ho hahalok ne’ebé nia komete Tribunál kondena pena prizaun efetivu tinan sanulu, tanba faktu prova katak AC envolve duni krime ne’ebé Ministériu Públiku imputa ba nia.

Razaun Tribunál fo liberdade kondisionál, tanba AC kumpre ona metade pena tinan lima husi pena efetivu tinan sanulu ne’ebé aplika ba kondenadu no durante iha prizaun rekluzu hatudu hahalok di’ak.

Iha sala julgamentu Juiza Ana Paula Fonseca hateten Tribunál hasai mandadu libertasaun ba kondenadu AC hodi fó liberdade kondisionál no husu ba nia atu labele komete tan atu ne’e.

“Kona-ba saida mak aprende iha prizaun atu sai bá li’ur labele komete tan krime ne’ebé antes ne’e halo. Se durante liderdade kondisionál halo fali krime foun, sei filafali bá iha kadeia hodi kumpre restu husi kastigu ne’e ka kastigu ba krime foun”, Juiza Ana Paula dehan iha Caicoli, ohin.

Juiza ne’e hateten ba AC katak esperiénsia iha prizaun sai hanesan lisaun ida hodi bele ajuda atu prevene aan ba hahalok ka krime sira ne’ebé ho nia natureza seksuál.

“Tribunál fó hanoin katak rekluzu nia pasadu bele ajuda hodi sai ema foun, katak hadook aan husi hahalok hanesan ne’e iha futuru, tanba hatene ona saida mak di’ak. Tribunál fo oportunidade ba rekluzu atu bele komprova kompromisu ne’ebé rekluzu halo ona no apoiu husi rekluzu nia kaben. Tribunál fiar sei hasoru dezafiu sira”, nia salienta.

Iha sala julgamentu laran, AC deklara katak durante iha prizaun aprende buat barak liuhusi formasaun kona-ba kontrola hirus, lian inglés, nomós kona-ba oinsá atu hadook aan husi violasaun sira. Iha mós formasaun husi padre sira kona-ba Jesus nia futar fuan santu no hahí ba Jesus.

“Sai bá li’ur ha’u sei kontrola aan no hasees aan husi buat ne’ebé la diak, liuliu krime tanba ha’u iha prizaun laran aprende ona kona-ba saida mak di’ak no arrepende tebes ba ha’u-nia hahalok ne’e no promete iha li’ur sei hadook aan husi krime sira”, nia afirma.

Hafoin rona tiha AC nia deklarasaun, Tribunál mós rona deklarasaun husi rekluzu nia kaben ho insiál S. Iha sala julgamentu AC nia feen S deklara ba Tribunál katak durante AC iha prizaun nia sente falta xefe família no triste ba família ho hahalok rekluzu nian.

Nia dehan hahalok ne’ebé AC halo ne’e ba dahikus nian no labele repete no nia prontu simu fali nia kaben AC hodi moris hamutuk hanesan família ida.

¨Maske nia [AC] tama tiha kadeia, maibé ohin simu liberdade kondisionál husi Tribunál, ha’u prontu simu fali nia hanesan hau-nia kaben. Problema ne’ebé akontese ne’e akontese ona”, nia hato’o.

S aprezenta razaun simu fali rekluzu, tanba sira na’in-rua halo ona kazamentu iha Igreja no fiar ba juramentu ne’ebé dehan “sei la soe ó iha tempu susar no terus nia laran no ba oin sei moris feliz”, nia afirma.

Hafoin Tribunál rona tiha rekluzu ho nia kaben, ikus mai Ministeriu Públiku liuhusi Prokuradór Osório de Deus dehan lei ezekusaun penál sita kona-ba kazu sira hanesan ne’e tenke liuhusi avaliasaun relatóriu husi estabelesimentu prizionál no diresaun nasionál reinsersaun sosiál ba rekluzu rasik. No bazeia ba relatóriu katak dadur iha komportamentu di’ak bele hetan liberdade kondisionál.

“Husu Tribunál tetu atu fo hanoin ba rekluzu kuandu reintegra ba iha sosiedade labele hamosu tan krime referidu”, nia fo hanoin.

AC nia defensora Agustinha de Olivera deklara katak rekluzu hateten ona aprende buat barak iha prizaun, tanba ne’e tau konfiansa bainhira nia sai bá li’ur sei implementa saida mak aprende iha prizaun.

Jornalista: Natalino Costa

Editora: Maria Auxiliadora

iklan
iklan

Leave a Reply

iklan
error: Content is protected !!