VIQUEQUE, 30 janeiru 2025 (TATOLI)—Diretór Ensinu Sekundáriu Tékniku Vokasionál (ESTV) Kalo-Heda, postu Uatulari, munisipiu Viqueque, Zainal Abadin, hateten ESTV Kalo-Heda kontinua enfrenta problema menus profesór hodi hanorin estudante iha Departamentu Informátika no Teknolojia (IT).
Notísia Relevante: Laiha profesór, Diretór no Adjuntu ESTV Kalo-Heda uza osan privadu selu manorin na’in-tolu
“Iha ami-nia eskola agora daudaun ne’e kontinua enfrenta menus profesór ba departamentu IT. Iha tinan 2024, Governu hapara profesór sira-ne’ebé hanorin iha departamentu IT nune’e to’o ano letivu 2025, agora seidauk koloka profesór mai ami. Nune’e, ami hamutuk ho inan-aman sira rezolve profesór hanorin estudante sira,” Zainal Abadin hateten ba Agência Tatoli, iha ESTV Kalo-Heda, ohin.
Problema menus profesór ne’e, parte eskola aprezenta ona Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál (ESJ-ESTV) no aperzenta ba diretór servisu edukasaun munisípiu Viqueque, maibé seidauk iha resposta ruma.
“Ami kontinua hein hela tanba parte edukasuan mós mai foti ona dadús. Bainhira koloka profesór mai ami hodi hanorin estudante ESTV IT, iha tinan ida-ne’e númeru estudante aumenta. Maibé, profesór mak laiha ne’ebé ami uza profesór na’in-tolu (3) hodi hanorin provizóriu estudante sira,” nia dehan.
Alternativu substitui profesór departamentu IT ne’e, nia dehan, daudaun ne’e antigu profesór kontratadu ne’ebé uluk hanorin iha Departamentu IT, dirijenti eskola sira bolu ajuda hanorin, depois fó osan mina nian kada fulan ida profesór na’in-ida hetan $20, hodi hanorin estudante hahú husi tinan 2024 to’o agora mós kontinua hanesan ne’e.
“Ami iha esperansa, iha fulan-fevereiru no marsu, Governu rekruta ona entaun bele mai prienxe ona iha departamentu IT. Ami fiar katak tempu badak ami-nia ministériu sei rezolve menus profesór tanba sira rekolla ona dadús profesór iha ami-nia eskola,” nia hateten.
Tuir dadús, estudante ESTV Kalo-Heda husi klase 1 to’o klase 3 hamutuk na’in-12) no profesór hamutuk na’in-15.
Hatán ba preokupasaun ne’e, diretór edukasuan munisípiu Viqueque, Julio Sakadura, husu ddiretór ESTV Kalo-Heda kontinua aprezenta pedidu mai servisu edukasaun munisípál, depois servisu edukasaun munisípál aprezenta problema menus profesór ba Ministériu Edukasaun (ME) hodi haree.
“Kona-ba menus profesór sira-ne’e, ha’u husu diretór eskola nafatin hato’o pedidu ba ami, atu ami bele haruka ba nasionál hodi rezolve menus profesór ba departamentu IT ne’ebé daudaun ne’e menus,” nia dehan.
Jornalista : Vitorino Lopes da Costa
Editór : Cancio Ximenes
