COVALIMA, 30 janeiru 2025 ( TATOLI)- Autoridade Florestál Munisípiu Covalima daudaun ne’e distribui ona fini ai-oan hamutuk 2500 ba agrikultór sira husi postu administrativu Maucatar no Suai, Munisípiu Covalima.
Xefe Departamentu Reprezentasaun Territoriál Floresta Planta no Indústria Covalima, Domingos Gusmão, esplika, Floresta Covalima distribui fini ai-oan depende ba agrikultór sira submete sira-nia pedidu hafoin bele fó apoiu fini ai-oan, bainhira distribui de’it agrikultura la intrese ne’e mós la di’ak.
“Ami distribui ona fini ai-oan ne’ebé ami prodús iha viveiru komunitária tolu mak hanesan viveiru komunitáriu husi diresaun nasionál floresta rua no viveiru komunitária husi munisípiu ida”, Domingos Gusmão informa ba TATOLI, iha Kampung-Baru, ohin.
Dirijente ne’e haktuir, viveiru komunitáriu tolu ne’ebé estabelese iha Covalima ne’e guarda sira prodús fini ai-oan hamutuk 578,228,68, husi númeru ne’e distribui ona fini ai-oan hamutuk 2500 ho tipu ai-oan hanesan ho espesie kakeu, saria no mahuni.
Fini Ai-oan ne’ebé guarda florestál sira prodús ho durasaun tempu fulan neen tanba ne’e mak daudaun ne’e tempu udan floresta hahú atende ona pedidu ne’ebé submete husi agrikultór sira ne’ebé iha inisiativa atu kuda ai-oan.
Iha sorin seluk, Agrikultór João da Costa, reforsa katak, daudaun ne’e époka udan nune’e bainhira kuda fina ai-oan ne’ebé distribui husi floresta ne’e moris, maibé importante mak kuidadu atu karau labele estraga .
“ Ita kuda fini ai-oan sira ne’e iha luta laran maibé dala ruma karau tama to’os ai-oan sira ne’ebé ita kuda estraga hotu, iha tempu udan kuda ai-oan ne’e importante nune’e ita bele hamatak ita-nia rai, evita dezastre hanesan erosaun no seluktan”, nia hatete.
Kuda ai-oan horis iha valór oi-oin hanesan kuda ai-kameli iha valór ekonómiku bo’ot no mós presiza trata natureza ho di’ak bainhira la kuda ai no hakarak tesi de’it fó impaktu boot bainhira tempu udan hamosu erozasaun no iha tempu bailoro halo bee maran.
Jornalista: Celestina Teles
Editór: Rafael Ximenes de A. Belo
