DILI, 30 Janeiru 2025 (TATOLI) – Ministru Asuntu Kombatente Libertasaun Nasionál, Gil da Costa Monteiro ‘Oan Soru’, aprezenta projetu rezolusaun Governu nian iha Konsellu Ministru (KM) no hetan ona aprovasaun. Projetu ne’e sobre implementasaun medida legál kona-ba rejistu dadus kombatente no mártir sira-nian ba libertasaun nasionál, ne’ebé rezultadu husi publikasaun avizu rejistu daruak-2009.
Vise-Ministru ba Asuntu Parlamentár, Adérito Hugo da Costa, hateten rezolusaun ida-ne’e Governu reafirma nia apoiu inkondisionál ba Ministériu Asuntu Kombatente Libertasaun Nasionál, iha implementasaun medida hotu-hotu relasiona ho publikasaun avizu rejistu 2009 nian, tuir termu sira ne’ebé estabelese ona iha Estatutu Kombatentes Libertasaun Nasionál nian, ne’ebé aprova ona husi lei númeru 3/2006, loron 12 fulan-abríl, altera husi lei númeru 9/2009, loron 29 Jullu, lei númeru 2/2011, loron 23 fulan-Marsu no Lei n.3/2024, loron 12 fulan-juñu.
“Governu iha no sei komprometidu nafatin atu garante katak prosesu tomak rejistu dadus kona-ba kombatente libertasaun nasionál nian hala’o ho forma integrál no bazeia eskluzivamente ba lei, hodi garante kombatente hotu-hotu nia direitu”, governante dehan iha Palásiu Governu, ohin.
Tuir termu Estatutu Kombatente Libertasaun Nasionál nian, karik laiha konkordánsia ho dadus ne’ebé publika ona, interesadu sira iha direitu atu aprezenta reklamasaun ho provas ne’ebé fundamentadu, individualmente, iha prazu loron 60 hahú hosi data publikasaun avizu ne’e.
“Ema ne’ebé halo deklarasaun falsu ka fó informasaun falsu, ka falsifika dokumentu relasiona ho prova militánsia iha luta libertasaun nasionál ho intensaun atu hetan direitu ne’ebé konsagra iha Estatutu Kombatente Libertasaun Nasionál, sei hetan kastigu tuir lei haruka”, afirma.
Jornalista: Arminda Fonseca
Editora: Maria Auxiliadora
