VIQUEQUE, 31 janeiru 2025 (TATOLI)—Diretór eskola Ensinu Báziku Sentrál (EBC, sigla portugés) 10 Iraler ne’ebé lokaliza iha foho Matebian, suku Matahoi, postu Uatulari, munisípiu Viqueque, Afonso Pinto, informa daudaun ne’e estudante sira tuur iha rai hodi partisipa prosesu aprendizajen, tanba eskola ne’e menus karteira eskolár.
“Ami-nia preokupasaun ba eskola, kadeira no meza sira husi tinan 10 nian ne’ebé tohar hotu pna. Nune’e, estudante sira mai partisipa prosesu aprediszjen tenke tuur de’it iha rai mak hakerek,” Afonso Pinto hateten ba jornalista sira iha área Nunumalau, ohin.
Nia hatutan, kadeira no meza ne’ebé laiha difikulta estudante sira iha tempu ensinu aprendizajen la’o ne’e, estudante na’in-rua (2) mak okupa kadeira ida no balun tenke tuur iha rai tanba laiha meza no kadeira.
Problema seluk, nia dehan, saladeaula EBC 10 Iraler hahú husi primeiru ano to’o nonu ano ne’e, saladeaula primeiru ano iha sala neen ne’ebé komunidade konstrui ho materiál lokál hodi didin ho au, ne’ebé agora nia kondisaun aat ona. Saladeaula ba terseiru siklu, Governu konstrui sala tolu (3) ne’e mak ninia kondisaun sei di’ak.
“Maibé, saladeaula husi primeiru ano to’o setimu ano mak saladeaula kondisaun grave. Ita-nia komunidade mak harii, ne’ebé ai-riin uza ai no didin ho au ne’e kuaze tinan 15 ona, uma nia didin dodok ona. Nune’e, iha tempu udan sai ameasa ba ita-nia estudante no profesór sira,” nia informa.
Preoblema hirak ne’e, nia parte aprezenta ona ba servisu edukasaun munisipál no ba Ministériu Edukasaun (ME), maibé to’o agora seidauk rezolve tanba seidauk iha resposta ruma.
“Problema ne’ebé ami enfrenta durante ne’e, ha’u aprezenta beibeik ona ba munisípiu no Ministériu, maibé to’o agora seidauk fó resposta ba ami-nia preokupasaun. Tan ne’e, ha’u husu ME apoiu fasilidade kadeira no meza no konstrui edifísiu ba primeiru ano no setimu ano nian,” nia dehan.
Tuir dadús, estudante EBC 10 Iraler husi primeiru ano to’o nunu ano ho totál hamutuk na’in-165 no prtofesór totál hamutuk na’in-15.
Hatán ba preokupasaun ne’e, Diretór Servisu Edukasaun munisípiu Viqueque, Julio Sakadura, haktuir kona-ba fasilidade kadeira no meza, iha tinan 2025 ne’e Ministériu Edukasaun planeia atu apoiu kadeira no meza ba eskola sira maibé eskola tenke aprezenta pedidu ba lojistika ME nasionál hodi hetan kadeira no meza.
“Ba eskola sira-ne’ebé kadeira no maza menus, hato’o pedidu mai edukasaun munisípiu Viqueque hodi aprezenta ba lojistika nasionál. Atu nune’e minsitériu sosa kadeira no meza karik bele hetan,” nia dehan.
Jornalista : Vitorino Lopes da Costa
Editór : Cancio Ximenes
