Kondisaun edífisiu eskola EBC 09 Haenaudere Afaloikai grave
VIQUEQUE, 31 janeiru 2025 (TATOLI)—Edifísiu eskola Ensinu Báziku Sentrál (EBC, portugés) 09 Haenaudere ne’ebé lokaliza iha Uelakurata, aldeia Uaikai, suku Afaloikai, postu Uatulari, munisípiu Viqueque, daudaun ne’e nia kondisaun grave hodi difikulta prosesu aprendizajen.
Reprezentante Diretór ESKOLA EBC 09 HaenAudere, Armindo Soares, hateten eskola EBC 09 Haenaudere harii iha tempu UNTAET nian ne’ebé esforsu husi komunidade mak harii eskola maibé agora daudaun nia kondiasuan aat ona maibé seidauk reabilita.
“Ami-nia kondisaun eskola agora aat hotu ona, ne’ebé difikulta mós ba ami-nia prosesu aprendizajen. Tan ne’e, ami hakarak rekomenda ba Governu liuhusi Ministériu Eduksaun (ME) hodi tau ba planu reabilita edifísiu EBC 09 Haenaudere,” Armindo Soares hateten ba jornalista sira iha eskola Haenaudere, ohin.
Nia relata, kondisaun atuál edifísiu eskola refere daudaun ne’e zinku aat nakloke, kapon dodok, janela no odamatan aat, tanba ne’e husu Ministériu Edukasaun presiza tau atensaun hodi halo reabilitasaun.
Kona-ba prosesu aprendizajén, nia dehan, daudaun ne’e prosesu aprendizajen iha eskola EBC 09 Haenaudere la’o normál, maibé tempu udan no anin boot ne’e atividade posesu aprendizajen la la’o.
Iha fatin hanesan, reprezentante autoridade no atuál lia-na’in husi suku Afalokai, Martins Soares Marques, husu Governu reabilita edifísiu eskola EBC 09 Haenaudere hodi profesór no estudnte sira uza ba prosesu aprndizajen tanba eskola ida-ne’e ho kondisaun grave ona.
“Ami husu ba Governu liuhusi Ministériu Eduksuan (ME) reabilita edifísiu EBC Haenaundere hodi uza prosesu apredizajen. Se la reabilita sei difikulta ba ita-nia estudante no profesór ba prosesu aprendizajen,” nia hateten.
Enkuantu, eskola EBC 09 Haenaudere referida konstrui husi komunidade internasionál Asosiasaun Nosa Senora de Lurdes husi nasaun Austrália ne’ebé kontrui sala lima, iha tempu UNTAET nian.
Tuir dadus, etudante ano letivu 2025 husi EBC 09 Haenaudere husi klase 1 to’o klase 9 hamutuk na’in-73 no profesór permanente na’in-11 ne’ebé ativa hanorin estudante sira.
Iha fatin seluk, diretór servisu edukasaun munisípiu Viqueque, Julio Sakadura, haktuir kona-ba kondisaun edifísiu EBC 09 Haenaudere ne’ebé daudaun ne’e aat, jerente eskola presiza aprezenta pedidu mai servisu edukasaun.
“Kondisaun edifísiu EBC 09 Haenaudere ne’ebé dadauk ne’e aat, ha’u husu dirijente sira aprezenta pedidu atu ha’u bele relata ba nasionál,” nia dehan,
Jornalista : Vitorino Lopes da Costa
Editór : Cancio Ximenes
