DILI, 31 janeiru 2025 (TATOLI)—Servisu Saúde Munisípiu Dili (SSMD) rejista pasiente hamutuk 67 infetadu dengue iha janeiru tinan ne’e nia laran, ne’ebé maioria husi númeru ne’e hanesan labarik ho idade tinan-lima mai kraik.
“Labarik sira ne’e afetadu husi tinan-lima mai kraik nomós idade tinan-hitu ba leten no área ne’ebé afetadu liu mak postu administrativu Dom Aleixo tuir mak Cristo Rei no Na’in-Feto,” Diretór Servisu Saúde Munisípiu Dili, Mateus Pinto, informa ba Agência Tatoli, iha ninia knaar fatin, sesta ne’e.
Notísia relevante : Udan monu rai Servisu Saúde Ermera rejista kazu dengue 27
Maski nune’e, iha fulan ne’e seidauk rejista pasiente mate tanba moras dengue.
Nune’e, Diretór Servisu Saúde husu ba família idaidak atubele hamoos uma ninin sira no hamoos bee ne’ebé nalihun iha botir ka kalen sira, nune’e bele evita susuk tolun hodi fó moras ba populasaun sira.
“Kona ba ai-moruk fomigasaun ho abate ita sufisiente atu atende ba populasaun sira ne’ebé mak iha área risku sira,” nia tenik.
Jornalista : Felicidade Ximenes
Editora : Julia Chatarina
