DILI, 31 janeiru 2025 (TATOLI)–Prezidente klube Boxe El Matador no atuál treinadór prinsipál, Abilio Orlando dos Santos, hateten lider karismátiku Kay Rala Xanana Gusmão fo apoiu morál ba boxista Delio Mouzinho no Daniel Belo tuir kompetisaun iha Holywins Sport Show (HSS) iha Bali, Indonézia.
Notísia Rekevante: Boxista Delio Mouzinho-Daniel Belo sei kompete iha eventu HSS Bali
Nia hateten kestaun ne’e, hafoin nia akompaña boxista na’in-rua (2), Delio Mouzinho no Daniel Belo, hasoru-malu ho líder karismátiku Kay Rala Xanana Gusmão hodi husu apoiu morál antes aranka ba Indonézia iha fulan oin, no iha biban ne’e Xanana mós fó apoiu finansiru ho osan privadu hamutuk $3.400.
“Foin lalais ami hasoru duni ita-nia líder karsimatiku no atuál Primeiru-Ministru Kay Rala Xamana Gusmão, bainhira ami hasoru Avo Nana nia fó apoiu ami osan hamutuk $3.400, ne’e apoiu privadu tanba ami nia proposta haruka ba ne’e sira fó fila fali,” Abilio Orlando hateten ba Agência TATOLI liuhusi WhatsApp, sesta ne’e.
Iha hasoru malu ne’e, líder rezisténsia ne’e mós fó hanoin ba boxixta na’in-rua (2) atu hatudu jogu ho di’ak hodi reprezenta Timor-Leste ho dignidade.
Iha parte seluk, boxista na’in-rua ho treinadór ne’e hasoru malu ho Ministru Komérsiu Industria (MKI), Nino Pereira, hodi fóa apoiu morál no apoiu finanseiru antes dezloka ba Bali-Indonézia hodi tuir kompetisaun.
“Ami mós antes ne’e ba hasoru Ministru Nino Pereira, iha ne’ebá sira apoiu mós ami ho moral. Ministru mós fó apoiu osan hamutuk $250 ba atleta Delio,” nia dehan.
Nune’e mós, sesta ne’e, treinadór Abilio lori boxista Delio Mouzinho ho Daniel Belo hasoru malu ho Vise-Primeiru-Ministru, Ministru Asuntu Sisiál no Ministru Dezenvolvimentu Rurál, Abitasaun Komunitária, Mariano Assanami Sabino, iha Palásiu Governu, Dili, hodi husu motivasaun antes aranka ba Bali-IOndonézia. .
Iha hasoru-malu ne’e, Assanami ho inisiativa fó mós apoiu orsamentu privadu ne’ebé ho montante konfidensiál la presiza fó sai ba públiku, atu apoia atleta sira bele iha esperansa makaas tuir kompetisaun sira ho di’ak.
“Ami ba hasoru Assanami atu husu motivasaun morál mai ami, antes ami ba kompete iha jogu ne’ebé sei hala’o iha Bali fulan oin. Hasoru-malu ne’e, Assanami mós fó apoiu finanseiru balun maibé ne’e osan privadu. Maske uitoan hela maibé ami agradese tebes,” Abilio hateten ba Agência TATOLI liuhusi WhatsApp, sesta ne’e.
Kona-ba preparasaun atleta sira-nian, nia dehan, daudaun ne’e atinje ona 99% no atleta na’in-rua preparadu atu kompete iha eventu internasionál ne’e.
Iha jogu ne’ebé atleta na’in-rua atu enfrenta hanesan Delio sei joga iha ronde neen (6) no Daniel sei kompete iha ronde haat (4).
Tuir orariu ne’ebé iha, ekipa husi boxista na’in-rua sei aranka ba Indonézia iha loron 06 fulan-fevereiru tinan 2025, no kompetisaun refere sei realiza iha loron 12 fulan-fevereiru tinan 2025.
Jornalista : Hortencio Sanchez
Editór : Cancio Ximenes
