Albert Tefa sai fitun, Hibers halo festa golu 6-1
DILI, 02 Juñu 2026 (TATOLI)—Hanesan udan be nakfakar husi lalehan habokon rai, Klube Hibers Dili FC halo Weasel nia oin abu-abu taka metin ho festa golu 6-1, iha jogu kontinuasaun Liga Futeból Timor-Leste (LFTL) Segunda Divizaun époka 2026 iha Estádiu Munisipál Dili, tersa kalan.
Jogu ne’ebé marka ho golu 7 no kartaun 6, tenke para kuaze minutu 5 hafoin jogadór no ofisiál Weasel protesta maka’as kartaun mean ba Francisco Fernandes iha minutu 72. Iha jogu ne’e, avansadu Hibers, Arbert Tefa, sai fitun hodi hatama golu haat ba guarda rede Weasel nian.
Jogu semana datoluk Segunda Divizaun ne’e lidera husi árbitru prinsipál Francisco Pereira, hetan asisténsia husi juiz liña António Carvalho no Donatos Portela ho árbitru rezerva Mario Ximenes.
Hibers Dili FC ne’ebé lidera husi treinador José Gomes hatudu kedas sira-nia ambisaun husi minutu primeiru. Iha minutu haat (4), médiu Gabriel Ati (8) loke skor 1-0 ho xutu husi li’ur área laran hafoin simu pasa husi Arbert Tefa.
Jogadór Hibers domina iha jogu iha kampu laran. Avansadu Arbert Tefa (9) hahú ninia festa golu iha minutu 16 hodi duplika vantajen ba 2-0. Tefa marka tan ninia golu segundu pesoál iha minutu 34, aproveita falha komunikasaun entre guarda-rede no defeza Weasel nian, hodi taka primeira parte ho golu 3-0.
Haka tba segunda parte, Weasel ne’ebé lidera husi treinadór Henrique Xavier tenta hadi’a jogu m aibé esforsu ne’e fó rezultadu iha minutu 61 bainhira avansadu Richard Bere (9) konsege redús ba 3-1 liu husi xutu maka’as hafoin simu kruza husi nia belun jogadór karuk.
Maibé, esperansa Weasel nian mate lalais. Gabriel Ati (8) marka ninia golu segundu iha minutu 69 hodi muda skor ba 4-1. Hafoin ne’e situasaun kampu laran hahú manas.
Kartaun Mean Hamosu Konfuzaun Boot
Momentu krusiál akontese iha minutu 72. Médiu Weasel, Francisco Fernandes (20), halo falta todan tebe jogadór Hibers nia kabun. Árbitru Francisco Pereira la ezita no fó kedas kartaun mean direta ba Fernandes.
Desizaun ne’e hamosu protestu maka’as. Jogadór no ofisiál balun husi Weasel tama kampu laran hodi hakbesik no ameasa árbitru. Jogu tenke para kuaze minutu lima (5) tanba situasaun la kontroladu. Adeptus atus ba atus iha tribun leten mós protesta la simu desizaun árbitru nian, tuda bee plástiku ba kampu laran.
Hafoin seguransa no ofisiál LFTL kontrola situasaun, jogu kontinua ho Weasel joga ho ema 10.
Joga ho ema barak liu, Hibers aproveita ho didi’ak. Iha tempu kompensasaun, Arbert Tefa (9) hatudu klase liu husi marka tan golu rua (2): iha minutu 90+1 no 90+5, hodi taka skor ba 6-1. Tefa ramata jogu ho golu lima (5) mesak.
Lista Kartaun: Weasel Hetan 1 Mean, 4 Kinur
Jogu dramátiku ne’e prodús kartaun 6, hotu-hotu ba Weasel ho Lista kompletu:
55’ Kartaun Kinur: Emildio Casmiro (4) Weasel
65’ Kartaun Kinur: Deonizio Martins (6) Weasel
72’ Kartaun Mean: Francisco Fernandes (20) Weasel, duni sai
90’ Kartaun Kinur: Nilton de Jesus (49) Weasel
90+7’ Kartaun Kinur: Bendito Lemos (25) Weasel
Enkuantu, Hibers Dili FC remata jogu sem kartaun
Husi vitoria ne’ebé Hibers hetan lori ekipa ne’e rekolla ona pontu hitu (7) husi joga dala tolu iha grupu B no Weasel foin mak rekolla pontu ida husi jogu dala rua.
Jornalista : Hortêncio Sanchez
Editór : Cancio Ximenes
