DILI, 17 janeiru 2025 (TATOLI)–Prezidente klube Boxe El-Matadór no treinadór, Abilio Orlando dos Santos, hateten iha tinan ida-ne’e El-Matadór sei tuir kompetisaun barak no daudaun ne’e prepara ona atleta na’in-rua hanesan Delio Mouzinho no Daniel de Asis Belo atu ba kompete iha eventu Holywings Sport Show (HSS) Bali, Indonézia, iha 09 fevereiru 2025.
Notísia Relevante: El-Matador kongratula boxista Delio okupa segundu lugar iha SEA Games
“Tinan ida-ne’e eventu barak mak El-Matadór Boxe sei tuir. Fulan oin (favereiru) eventu HSS iha Bali-Indonézia, ita-nia Boxista profisionál na’in-rua )2) mak sei ba kompete, Delio ho Daniel,” Abilio hateten ba Agência TATOLI iha Benfica, Colmera, ohin.
Nia dehan, Boxista na’in-rua ne’e daudaun ne’e halo ona preparasaun másimu no prontu atu ba kompete iha eventu internasionál ne’e.
“Agora, ita-nia Boxista profisionál na’in-rua ne’e prepara ona. Eventu ne’e Delio sei joga iha ronde neen (6) no Daniel sei joga iha ronde haat (4). Sira-nia preparasaun ne’e, ita bele dehan másimu tanba ba joga ne’e sira sei hasoru Boxista ne’ebé kampiaun iha Indonézia. Maibé, ita la tauk. Sira-na’in rua nafatin treinu iha fíziku, tékniku no tatíku,” Abilio tenik.

Eventu ne’e, nia dehan, klube El-Matadór ba partisipa tanba hetan konvite direta husi komisaun organizadora Holywings Sport Show (HSS) iha Bali, Indonézia, nune’e nia tau konfiansa ba nia Boxista na’in-rua ne’e sei hatudu performa no rezultadu ne’ebé di’ak hodi hamorin Timor-Leste nia naran.
“Ita hetan konvite husi sira HSS, ita ba ne’e hetan apoiu másimu husi El-Matadór nia patrosinadór prinsipál sira hanesan Caltech, Borala Fuel Lda, Tahana no patrosinadór balun tan sei fó apoiu mai ita,” nia hateten.
Iha sorin seluk, Boxista Delio Mouzinho hateten, hanesan atleta ida nia parte preparadu no prontu atu ba kompete iha eventu internasionál ida-ne’e.
“Ha’u-nia preparasaun másimu ona no hein atu kompete iha eventu ne’e,” Delio Muzinho hateten.
Nune’e, nia husu ba povu Timor-Leste liuliu foinsa’e sira atu apoia nia liuhusi orasaun, atu fó kbiit ba sira na’in-rua (2) hodi kompete ho di’ak.
“Ha’u-nia mensajen ba maluk timoroan sira hotu, imi tenke apoia nafatin ha’u ho orasaun hodi fó forsa mai ha’u ho kolega ne’e atu kompete ho másimu,” Delio dehan.
Notísia Relevante: Délio uza Manny Pacquiao sai referénsia iha SEA Games
Jornalista : Hortencio Sanchez
Editór : Cancio Ximenes