Horta husu F-FDTL hametin kooperasaun hodi prevene krime transnasionál no seguransa marítima
DILI, 02 Fevereiru 2025 (TATOLI)- Prezidente Repúblika, José Ramos-Horta, subliña papél krusiál seguransa marítima no modernizasaun defeza ba prevene krime trans nasionál nian, iha selebrasaun aniversáriu FALINTIL – Forsa Defeza Timor-Leste (F-FDTL) ba dala-24 iha Kuartél-Jenerál.Dili.
Iha diskursu, Prezidente fó omenajen ba eroi nasionál sira, inklui Primeiru-Ministru Kay Rala Xanana Gusmão no atuál Tenente-Jenerál Falur Rate La’ek”, no rekoñese kontribuisaun sira husi parseiru internasionál sira hanesan Austrália, Xina, no Estadus Unidus iha konstrusaun kapasidade militár Timor-Leste nian
“Ita tenke hametin no hakbesik liután koperasaun militár rejionál, ho país sira seluk, nune’e ita hamutuk bele enfrenta di’ak liután liuliu prevene krime trans nasionál no terorizmu sira no asegura mos seguransa marítima”, Horta hateten iha Nia intervensaun bainhira partisipa aniversariu transformasaun Falintil ba Forsa Defeza neebe ba dala-24 neebe halo iha Kuartel Jeneral F-FDTL Fatuhada Domingu ohin.
Xefe Estadu mós subliña importánsia atu proteje Timor-Leste nia Zona Ekonómika Eskluziva (ZEE) ne’ebé luan no dezenvolve ekonomia azúl ne’ebé sustentável. Xefe Estadu destaka signifikadu estratéjiku husi Kampu Gás Naturál Greater Sunrise no husi biodiversidade tasi nian husi Illa Ataúro, hodi deskreve rejiaun ne’e hanesan “Amazónia husi Tasi sira”.
PR Horta mós aborda dezafiu kontemporáneu sira ne’ebé F-FDTL hasoru, hodi husu investimentu estratéjiku sira iha formasaun téknika no modernizasaun teknolójika.
Nesesidade ba kooperasaun rejionál ne’ebé maka’as liu hodi hasoru ameasa transnasionál sira no fó sai planu sira ba Lei Programasaun Militár ida hodi garante finansiamentu kontinua ba esforsu modernizasaun forsa armada nian.
Xefe Estadu mós destaka iha aniversáriu transformasaun F-FDTL ne’e: “Ita buka selebra mós espiritu unidade, determinasaun buat sira ne’ebé halo ita sai Timor-Leste. Ita halo ita nia kompromisu atu hari’i rai ida seguru, metin, modernu, riku, ita nia situasaun potensiál geo-polítika no ekonómiku, nune’e ita bele integra mós ita nia definisaun defeza nasionál objetivu dezenvolvimentu sustentavél no kooperasaun internasionál.”
Komandante Supremu F-FDTL ne’e hateten Timor- Leste iha Komponente Navál no iha papél ida importante tebes hodi halo defeza ba rekursu sira iha tasi,.
“Mós enfrenta ameasa potensiál oi-oin, hanesan infantária iha tasi liuliu prevene instituisaun ka grupu ne’ebé tráfiku droga, tráfiku umanu, imigrasaun ilegál no sira ne’ebé so’e lixu arbiru ba tasi-laran, ne’e duni ita tenke halo hametin no haforsa kapasidade ida ne’e”, PR Horta afirma.
Atu prevene asuntu ne’e, Xefe Estadu dehan presiza koopera ho parseria estratéjiku sira hanesan nasaun viziñu sira hanesan Austrália, Indonézia no sira seluk tan, ho teknolójia ne’ebé inovadór tebes.
Notisia relevante: Padre Adriano Olan husu membru F-FDTL banati espíritu FALINTIL
Jornalista : Natalino Costa
Editór : Florencio Miranda Ximenes
