VIQUEQUE, 03 fevereiru 2025 (TATOLI)—Abitante husi aldeia Dasu-Uati, suku Afalokai, postu adiministrativu Uatulari, munisípiu Viqueque, ne’ebé hela iha foho Matebian nia hun preokupa tebes ho kondisaun estrada ligasaun entre Uaikai ba Dasu-Uati ne’ebé aat, hodi difikulta komunidade lori sira-nia produtu lokál ba merkadu.
Notísia Relevante: Projetu reabilitasaun estrada rurál iha Viqueque hamutuk pakote sia
Abitante husi aldeia Dasu-Uati, suku Afalokai, postu adiministrativu Uatulari, munisípiu Viqueque, Teresa Pereira, hateten durante ne’e estrada ne’ebé aat difikulta abitante Dasu-Uati atu faan sira-nia sasán husi aldeia ba suku, husi suku lori faan iha postu ba munsípiu.
“Ami iha ne’e hakur mota rua no kondisaun estrada aat ne’ebé ami-nia inan-aman sira iha produtu agrikultura sira hanesan fehuk europa, talas, liis-mean nomutin, lakeru mutin, koto, jambua no sabraka, maibé sira labele lori ba merkadu. Nune’e mós, ami iha emerjénsia ruma difikulta asesu ba fasilidade saúde tanba distánsia ba postu saúde dook no karreta mós labele mai iha fatin ne’e,” Teresa Pereira hateten ba jornalista sira iha aldeia Dasu-Uati, ohin.
Tanba Estrada aat, nia hatutan, bainhira ema ruma hetan moras grave karik sira-nia família iha obrigasaun tenke tandu ka hulan ema-ne’ebé moras ne’e, hodi lori ba postu saúde atu halo tratamentu.
Tanba ne’e, nia husu ba Governu liuhusi Ministériu Obra Públika (MOP) konstrui estrada ne’ebé liga ba aldeia Dasu-Uati hodi abitante sira asesu.
“Ho kondisaun estrada ne’e, ami hakarak husu ba Governu liuhusi MOP hadi’a ami-nia estrada, atu bele fasilita ami ba asesu merkadu, postu saúde no eskola. Tanba durnte ne’e estrada sai difikuldade ba ema-ne’ebé hela iha área rural,” nia dehan.
Iha fatin hanesan, abitante Dasu-Uati, Msrcelo Caetano, sente triste haree kondisaun estrada liga aldeia Dasu-Uati ne’ebé aat hodi difikulta ba abitante sira buka moris liuhusi faan produtu lokál ba merkadu.
“Estrada ladi’ak, ami tenke la’o ain kuaze kilómetru rua (2) hafoin asesu ba postu saúde no oan sira asesu ba eskola tenke la’o kilométru rua. Enkuantu, ami atu ba asesu merkadu tenke lalin sasán la’o ain to’o kilómétru ualu (8). Tan ne’e, ami husu ba Governu se bele tau matan ba ami-nia estrada hodi fasilita ami la’o ba-mai,” nia dehan.
Iha fatin hanesan, reprezentante autoridade suku no atuál lia-na’in suku Afalokai, Martins Soares Marques, rekoñese kondisaun estrada husi Uaikai ba Dasu-Uati ne’e kondisaun aat, nune’e suku Afaloikai iha tinan kotuk liuhusi Programa Nasionál Dezenvolviementu Suku (PNDS) prevee orsamentu hodi loke dalan hamutuk ualu (8) ho orsamentu totál hamutuk $48,000.
“Ami hahú loke husi área Kaitau kilómetru ualu (8). Iha segunda foin lalais e’e, ami deside aumenta tán kilómetru lima (5) hodi to’o Dasu-Uati, maibé loke de’it tanba montante orsamentu la sufisente. Ne’ebé, iha tempu udan ne’e aat fali, nune’e ami husu Governu reforsa hodi hadi’a dalan sira-ne’e hodi komunidade bele asesu,” nia hateten.
Hatán ba preokupasaun ne’e, Diretór Obra Publika (MOP) munisipiu Viqueque, Casildo Gomes, rekoñese kondisaun estrada ne’ebé liga ba área Dasu-Uati, difikulta tebes ba komunidade ne’ebé hela iha área rurál, nune’e ba preokupasaun sira-ne’e servisu obra munisípiu relata ona ba nasionál.
“Kona-ba dalan liga parte Dasu-Uati, ita aprezenta ona ba ministériu maibé sei prosesu hela no ita hein bainhira mak prosesu ka rfezultadu ne’e sai. Tanba, dadús ba estrada nian, ami aprezenta hotu ba ministériu hodi foti desizasaun. Tanba, nasionál mak iha orsamentu nune’e ami munisípiu laiha orsamentu. Ami rekolla informasaun sira-ne’e relata ba nasionál, hodi reabilita estrada sira-ne’ebé difikulta ba ita-nia komunidade Viqueque,” nia esplika.
Tuir dadús, abitante ne’ebé hela iha aldeia Dasu-Uati, suku Afaloikai ne’e hamutuk uma kain 20 no totál abitante hamutuk 200.
Notísia Relevante: Autoridade Uatulari lansa projetu reabilitasaun estrada rurál husi Nunumlau bá Iraler
Jornalista : Vitorino Lopes da Costa
Editór : Cancio Ximenes
