iklan

INTERNASIONÁL, HEADLINE

Asosiasaun Lorosa’e-Nippon hakarak kontribui ba hametin amizade no dezenvolvimentu TL

Asosiasaun Lorosa’e-Nippon hakarak kontribui ba hametin amizade no dezenvolvimentu TL

Primeiru-Ministru, Kay Rala Xanana Gusmão, enkontru ho eis-Embaixadór Japaun iha Timor-Leste, atuál Kónsul Onoráriu RDTL iha Tókio, Iwao Kitahara Iwao, iha Palásiu Governu, segunda (03/02). Imajen Tatoli/Francisco Sony

DILI, 03 Fevereiru 2025 (TATOLI) – Eis-Embaixadór Japaun iha Timor-Leste (TL), atuál Prezidente Asosiasaun Lorosa’e-Nippon, Iwao Kitahara, ho nia espoza, Yoshiko Kitahara, hasoru malu ho Primeiru-Ministru, Xanana Gusmão, hodi aborda kona-ba amizade entre país rua no Asosiasaun Lorosa’e-Nipon, ne’ebé hakarak tulun Timor-Leste nia dezenvolvimentu.

“Loraik ida ne’e, ami kontente tebes hasoru primeiru-ministru. Ami diskute kona-ba relasaun amizade entre Timor-Leste no Japaun no ami mós ko’alia kona-ba ami-nia Asosiasaun Loroasa’e-Nippon hakarak harii futuru komún no kontribui ba hametin relasaun entre nasaun Timor-Leste no Japaun”, Iwao Kitahara hateten iha Palásiu Governu, ohin.

Asosiasaun ne’e manifesta vontade atu partisipa iha dezenvolvimentu Timor-Leste hodi haburas interasaun pasífika povu ne’e nian ba moris armonia.

“Asosiasaun Loroasa’e -Nippon hakarak dezenvolve ita-nia futuru, ida-ne’e depende ba ema idak-idak, nune’e nasaun Timor-Leste sei forte liu. Ha’u hakarak kontribui amizade no dezenvolveimentu entre nasaun rua, neneik maibé bebeik, no ami kontente tebes mai iha ne’e no hakarak ita la’o hamutuk”, nia dehan.

Primeiru-Ministru, Kay Rala Xanana Gusmão, no eis-Embaixadór Japaun iha Timor-Leste, atuál Kónsul Onoráriu RDTL iha Tókio, Iwao Kitahara, hakuak malu bainhira enkontru iha Palásiu Governu, segunda (03/02). Imajen Tatoli/Francisco Sony

Asosiasaun Lorosa’e- Nippon ka Asosiasaun Japaun Timor-Leste estabelese ho objetivu atu haburas ligasaun ne’ebé metin liu entre país rua, ne’ebé foka liu ba komprensaun mútua, interkámbiu kulturál, komérsiu, no kooperasaun ekonómika no vise-versa.

Importánsia husi Asosiasaun ne’e mak hakarak hametin relasaun diplomátika. Ida-ne’e sai hanesan plataforma ida hodi hasa’e relasaun diplomátika entre Japaun no Timor-Leste.

Inisiativa ne’e lidera husi Iwao Kitahara ne’ebé hala’o knaar nu’udár Embaixadór Japaun nian ba Timor-Leste husi fulan-Setembru 2008 to’o 2011 no ninia esperiénsia sira durante tempu ne’e destaka importánsia atu hakle’an relasaun entre nasaun rua.

Aleinde ne’e, envolvimentu komunidade hodi enkoraja sidadaun japonéz sira ne’ebé envolve iha Ajénsia Kooperasaun Internasionál Japaun (JICA), Asisténsia Ofisiál bá Dezenvolvimentu (ODA) no organizasaun sira seluk atu envolve ho komunidade lokál iha Timor-Leste.

Ba hametin relasaun entre nasaun rua ne’e, ida mak liuhusi mobilidade laborál hodi haruka traballadór timoroan hodi tuir formasaun tékniku (TIT, sigla inglés) iha Japaun. Programa ne’e ho objetivu atu habelar kooperasaun entre nasaun rua iha área empregu nian.

“Tinan ida ne’e mós ami-nia asosiasaun hakarak serbisu hamutuk ho ema hotu hodi habelar informasaun no apoia atividade sira kona-ba Timor-Leste nian”, Iwao Kitahara hateten.

Iwao Kitahara nu’udar pesoál ida iha relasaun forte ho líder Timor-Leste nian hanesan mós pesoál importante ne’ebé iha sosiedade sivíl Japaun ne’ebé bele tulun halo konesaun ba setór privadu sira no organizasaun sira seluk hodi apoia dezenvolvolvimentu ekonómiku no indústria iha Timor-Leste, liuliu setór turizmu, peska, agrikultura liga ba promosaun kafé Timor-Leste nian no área importante seluk tan.

Notísia relevante: Governu nomea Kitahara Iwao nu’udar Honoráriu Konsul Jerál Timor-Leste ba Japaun

Jornalista: Arminda Fonseca

Editora: Maria Auxiliadora

iklan
iklan

Leave a Reply

iklan
error: Content is protected !!