iklan

MUNISÍPIU, VIKEKE

Asosiasaun Núkleu Rezisténsia 01 Afaloikai kee kolan 19 atu haki’ak ikan

Asosiasaun Núkleu Rezisténsia 01 Afaloikai kee kolan 19 atu haki’ak ikan

Asosiasaun Núkleu Rezisténsia (ANR) 01 husi aldeia Uaikai, suku Afaloikai iha inisiativa kee kolam 19 haki’ak ikan. Imajén Tatoli/Vitorino Lopes da Costa.

VIQUEQUE, 03 fevereiru 2025 (TATOLI)—Koordenadór Asosiasaun Núkleu Rezisténsia (ANR) 01 husi aldeia Uaikai, suku Afaloikai, postu dministrativu Uatulari, munisípiu Viqueque, Martins Soares Marques, informa membru ANR 01 iha inisiativa kee kolan unidade 19 atu   haki’ak ikan no boek.

“Daudaun ne’e, ami prepara ona kolan hamtuuk unidade 19, kada kolan ida ho medida 5 x 8cm. Ida-ne’e ami-nia inisiativa rasik, tanba ami iha ne’e rekurusu bee ne’ebé sufisiente hodi haki’ak ikan,” Martins Soares Marques, hateten ba Agência Tatoli iha aldeia Uaikai, ohin.

Kona-ba fini ikan, nia dehan, kolan prepara hotu ona maibé fini ikan mak Asosiasaun Núkleu Rezisténsia (ANR) 01 seidauk hetan hodi haki’ak iha kolan laran.

“Daudaun ne’e ami sei buka dalan oinsá hetan fini liuliu ikan nila, ikan mas no boek tanba ida-ne’e sai difikuldade ida ba ami. Nune’e, ami sei tenta ba ministériu relevante liuhusi Sekretáriu Estadu Peska (SEP) atu apoiu fini ba ami, atu bele husik ba kolan ne’ebé ami prepara ona. Kona-ba rekursu bee ne’ebé kanaliza ba kolan sufisiente, tanba bee-matan ne’ebé boot no komunidade uza ba halo natar la maran,” nia hateten.

Tan ne’e, nia husu parte relevante sira apoiu fini no motiva komunidade ne’ebé hela iha área remota hadi’a sira-nia vida liuhusi setór agrikultura.

Tuir dadus, membru Asosiasaun Núkleu Rezisténsia (ANR) 01 Uaikai hamutuk na’in-17 ne’ebé daudaun ne’e prepara kolan haki’ak ikan.

Iha fatin hanesan, Diretór Servisu Ministériu Agrikultura Pekuária, Peska no Floresta (SMAPPF) munisípiu Viqueque, Olivio Soares Freitas, haktuir daudaun ne’e iha sentru vivieru fini ikan oan seidauk iha tanba kolan Loihunu sei iha prosesu reablitasaun.

“Nune’e, ita-nia grupu agrikultór sira presiza hakarak husu ikan oan, ha’u husu ba Grupu sira di’ak liu hato’o pedidu ba Sekretáriu Estadu Peska (SEP) hodi apoiu fini ikan-oan husi fatin seluk. Tanba, ita Viqueque daudaun ne’e fini ikan oan seidauk iha, depois reabilitasaun ba kolan sira-ne’e ramata mak foin ita prodús fini ikan oan iha Sentru Viveiru Loihunu,” nia dehan.

Jornalista : Vitorino Lopes da Costa

Editór        : Cancio Ximenes

iklan
iklan

Leave a Reply

iklan
error: Content is protected !!