COVALIMA, 03 fevereiru 2025 (TATOLI)- Prezidente Autoridade Munisípiu (PAM), Covalima, Miguel Armada Cardoso, informa, dadaun ne’e autoridade Covalima identifika hela fatin atu soe lixu, iha Suku Beco, Postu administrativu Suai, Munisípiu Covalima.
“Foin lalais ne’e, ita halo ona diskusaun iha reuniaun konsellu koordenasaun munisipál atu identifika fatin atu soe lixu ne’ebé Governu lokál identifika fatin sira atu soe lixu hanesan Haemanu, maibé la naton ba ita”, PAM Covalima, Miguel Armada Cardoso, dehan ba TATOLI iha nia servisu fatin AMC, ohin.
Razaun Autoridade Covalima identifika tan fatin soe lixu tanba Ministériu Petróleu no Rekursu Minerais (MPRM) presiza fatin ne’ebé ho medida bo’ot; daudaun ne’e identifika hela, iha Suku Beco maibé seidauk iha rezultadu.
Autoridade munisipál ne´e informa, fatin lixu ne’ebé mak MPRM husu fatin lixu luan atubele transfere lixu iha fatin seluk no oinsá sira bele halo prosesu lixu, nune’e labele estraga ambiente balun entaun presiza rai ne’ebé ho medida boot, tanba durante ne’e munisípiu identifika mak fatin soe lixu Haemanu no fatin soe lixu iha Beco maibé seidauk iha rezultadu di’ak.
Tan ne’e nafatin sei halo aproximasaun hamutuk ho Terra no Propriedade Covalima atu identifika tanba daudaun ne’e munisípiu soe lixu iha fatin lixu Haemanu. Kona-ba fatin lixu iha Beco sei iha prosesu identifikasaun.
“Fatin soe lixu identifika fiksu ona. Lixu hotu tau hamutuk iha fatin ida, hanesan iha Beco fiksu ona. MPRM tau hamutuk iha lixu fatin ida, ita uza ida de’it, maibé daudaun ne’e munisípiu soe lixu iha Haemanu,” nia hatete.
Jornalista: Celestina Teles
Editór: Rafael Ximenes de A. Belo
