iklan

EDUKASAUN, HEADLINE

FEST prodús mákina inovasaun hodi haforte mikro indústria iha TL 

FEST prodús mákina inovasaun hodi haforte mikro indústria iha TL 

Reitór UNTL, João Soares Martins. Imajen Tatoli/Francisco Sony

DILI, 03 fevereiru 2025 (TATOLI)-Estudante Fakuldade Enjeñaria Siénsia no Teknolojia (FEST), ne’ebé prodús mákina inovasaun ida hodi haforte mikro indústria iha Timor-Leste.

“Mákina ne’ebé Fakuldade de Enjeñaria Siénsia no Teknolojia (FEST) mak prodús, ne’e hanesan inovasaun ida atu bele haforte liután ita-nia mikro indústria iha rai-laran, no agradese ba fakuldade ba sira-nia matenek no kontribuisaun inovasaun nune’e bele mellora ekonomia nasaun nian, no mós bele habelar siénsia ba komunidade”, Reitór Universidade Nasionál Timor Lorosa’e (UNTL), João Soares Martins, hatete ba TATOLI, iha Ministériu Ensinu Superiór Siénsia no Kultura (MESSK), Colmera, Dili, segunda ne’e.

Reitór UNTL João Soares Martins hatete, servisu ne’ebé UNTL halo liuhusi kooperasaun ho Ministériu Komérsiu no Indústria, ne’e hatudu iha área peskiza inovasaun no estensaun servisu, nune’e bele ajuda komunidade iha nível rendimentu ba produtu lokál sira.

“Ami UNTL ho Ministru MCI vizita no akompaña prosesu lubuk ida kona-ba mákina nuu-kulit maran ida, mákina ne’e prosesu nuu-kulit maran ne’e ba transforma ba ka tau iha sofa no halo tapete no nia rahun halo ba adubu. Ida-ne’e di’ak tebes, duké soe de’it, entaun liuhusi mákina ne’e bele halo rendimentu di’ak ba komunidade tanba durante ne’e ita soe de’it osan”, Reitór dehan.

Autoridade másima UNTL ne’e dehan, mákina ne’e estudante hosi fakuldade Enjeñaria UNTL mak halo entaun aban bainrua sei distribui ba Munisípiu ne’ebé iha nu’u barak hanesan Munisípiu Baucau. Nune’e UNTL hamutuk ho Ministériu Komérsiu Industria (MKI) halo lansamentu ba mákina modernu sanulu resin ida (11) ne’ebé sei distribui ba komunidade iha munisípiu neen hanesan, Baucau, Covalima, Manufahi, Liquiçá, Manatuto no Bobonaro.

Ho ida-ne’e Reitór dehan, UNTL agradese ba Ministériu Komérsiu Industria, ne’ebé tau importánsia ba kooperasaun ne’ebé halo nia rezultadu benefísiu tebes nune’e bele hadi’ak ekonomia nasaun nian.

Iha fatin hanesan, Ministru Komérsiu no Indústria, Nino Pereira hatete, eventu ne’e importante tebes ba iha dezenvolvimentu ekonomia no teknolojia hodi demostra nune’e fó benefísiu ba komunidade.

“Fó benéfisiu ita-nia rain, liuliu iha aspetu teknolojia no ekonomia liuhusi matenek no vontade ne’ebé iha. Kooperasaun ne’e di’ak tebes entre MCI ho UNTL liuliu FECT ne’ebé hatudu ona rezultadu investimentu iha verifikasaun ekonómiku hodi hatan mós ba programa IX governu, liuliu iha investimentu ekonomia nian, no agradese ba fakuldade ne’ebé prodús ona mákina ho teknolojia aplikavel hodi tulun emprendedorizmu kiik ne’ebé presiza”, Ministru dehan.

Purtantu, mákina ne’ebé produs hamutuk sanulu resin ida (11), hanesan Mákina te’in tua sabu hitu, Mákina loke nu’u-kulit rua (2), Mákina press nuu ida (1) no Mákina hamaran produtu lokál ida (1), no projetu ne’e realiza, tanba servisu hamutuk entre FEST ho Ministériu Komérsiu no Indústria no mós traballadór sira maihusi estudante Enjeñaria Mekánika no apoiu tékniku husi Alumni no Dosente sira.

Jornalista: Osória Marques

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!