COVALIMA, 03 fevereiru 2025 ( TATOLI)- Hahú janeiru to’o dezembru 2024 ne’e, floresta Covalima kontribui reseita rihun $ 19-resin ba kofre Estadu, Xefe Departamentu Reflorestasaun Territoriál, Floresta Planta no Indústria, Domingos Gusmão relata.
“Ami kontribui reseita ba kofre Estadu bainhira ita-nia komunidade sira mak faan ai-teka Mahoni no Gemelina, ita-nia empreza sira mak sosa. Ne’ebé, kada ai kúbiku ida, ita-nia empreza sosa ho nia folin $ 25.00”, Domingos Gusmão, dehan ba TATOLI, iha Kampung-Baru, ohin.
Xefe Floresta Covalima, esplika katak prosesu atu selu komunide sira selu direta iha Banku Nasionál Komérsiu Timor-Leste (BNCTL) ne’ebé mak durante ne’e komunidade sira ko’a halo negósiu hodi bele kontribui reseita ba kofre Estadu.
Bazeia ba regra husi floresta baihira atu ko’a ai presiza hasai lisensa husi Floresta. Atu ko’a ai, regra ba dahuluk mak presiza hato’o pedidu ba diresaun Floresta Nasionál hafoin hasai despaixu nune’e guarda florestál halo peskiza (survey) relata relatóriu ba nasionál.
“Floresta Covalima kontribui reseita ba kofre Estadu depende ba ita-nia komunidade sira fa’an ai indústria hanesan ai-teka no seluktan ba empreza sira sosa, hafoin empreza sira fa’an iha fatin sira seluk,” nia realsa.
Munisípiu Covalima iha potensiál ba ai indústria sira mak hanesan ai-teka hanesan iha postu Zumalai no Tilomar ne’ebé mak durante ne’e funsionáriu guarda-florestál sira mak halo patrulla hodi kontrola.
Tuir dadus daudaun ne’e funsionáriu ne’ebé ativa hodi presta sira-nia servisu iha edifísiu hamutuk na’in neen tanba funsionáriu guarda-florestál na’in-19 nia kontratu termina iha dezembru 2024 no daudaun ne’e sei prosesu hela sira-nia kontratu.
Jornalista: Celestina Teles
Editór: Rafael Ximenes de A. Belo
