iklan

HEADLINE

Quintas preokupa pontualidade julgamentu iha Tribunál Dili

Quintas preokupa pontualidade julgamentu iha Tribunál Dili

Defensór Públiku, Sergio Dias Quintas. Imajen Tatoli/Francisco Sony

DILI, 03 fevereiru 2025 (TATOLI)—Defensór Públiku, Sergio Dias Quintas,  preokupa julgamentu iha Tribunál Judisiál Primeira Instánsia Dili ne’ebé sempre tarde no la tuir notifikasaun ne’ebé Tribunál fó.

“Funsionamentu ne’e la’o normál, maibé problema ne’ebé to’o agora seidauk rezolve mak kuandu Tribunál hasai notifikasaun kona-ba oráriu julgmentu ne’e, laiha pontualidade. Pontualidade ne’e dezde uluk kedas Tribunál Primeira Instánsia iha prédiu tuan iha Colmera ne’e la kumpre ona,” Sergio hateten ba jornalista sira iha Tribunál Judisiál Primeira Instánsia Dili, segunda ne’e.

Nia haktuir, uluk prosesu julgamentu iha edifísiu Tribunál tuan iha Colmera sempre tarde tanba de’it iha ne’ebá dehan katak falta sala audiénsia ka sala julgamentu, maibé bainhira muda fali bá prédiu foun Caicoli, mantein nafatin ida-ne’e.

“Ida-ne’e kestaun ida-ne’ebé sériu. Tenke rezolve. Prezidente Tribunál Rekursu, Prokuradór Jerál Repúblika, Defensór Públiku Jerál no Prezidente Advogadu sira túr hamutuk para rezolve tiha kestaun ida-ne’e,” nia propoin.

Nia sujere, iha interveniente prosesu iha futuru, karik defensór ka prokuradór tantu advogadu privadu mai tarde, entaun bele fila ona, labele mai hein oras ba oras depois sein justifikasaun.

Jurista ne’e hateten kuandu pontualidade julgamentu sira-ne’e la hadi’a, sei afeta ba kazu pendente sira bele aumenta.

“Ida-ne’e fó impaktu ladi’ak no imajen ladi’ak ba ita-nia sosiedade. Ita hakarak justisa ida efisiente no efikásia,” Quintas tenik.

Ba kestaun ne’e, Prezidente Tribunál Rekursu, Deolindo dos Santos lakohi fó komentáriu. “Ha’u la ko’alia kona-ba ida-ne’e,” nia informa.

Jornalista: Natalino Costa

Editór: Xisto Freitas da Piedade

 

iklan
iklan

Leave a Reply

iklan
error: Content is protected !!