DILI, 04 fevereiru 2025 (TATOLI)—Diretór Servisu Nasionál Ambulánsia Emerjénsia Médika (SNAEM, I.P), Simplício Amaral de Deus, hateten durante tinan 2024 ambulánsia tula pasiente sira ne’ebé halo transferénsia mai Hospital Nacional Guido Valadares (HNGV) hamutuk 14.791.
“Durante tinan ida ita halo transferénsia pasiente husi munisípiu hotu mai HNGV hamutuk 14.791. Husi númeru ne’e, maioria inan isin-rua ne’ebé ho kazu komplikadu,” Simplício informa ba TATOLI, iha nia kna’ar fatin, SNAEM, I.P, Caicoli, tersa ne’e.
Nia dehan, moras hirak-ne’e transferidu mai iha HNGV, tanba la konsege halo atendimentu iha-ne’ebá, liuliu kazu komplikasaun sira.
Aleinde ambulánsia, aviaun Mission Aviation Fellowship (MAF) mós tula pasiente transferidu husi munisípiu mai nasionál hamutuk 301.
“Iha aviaun MAF ne’ebé mak durante ne’e tula pasiente sira husi munisípiu mai nasionál hanesan Ataúro pasiente hamutuk 103, Baucau 16, Bobonaro 28, Manufahi ualu, Covalima 69, Lautém 14, RAEOA 43 no Viqueque 20,” nia relata.
Tuir nia, pasiente hirak ne’e maioria inan isin-rua no pasiente dengue ne’ebé labele halo tratamentu iha postu saúde no ospitál referrál.
Jornalista: Felicidade Ximenes
Esditór: Xisto Freitas da Piedade