COVALIMA, 03 fevereiru 2025 ( TATOLI)- Ministru Petróleu no Rekursu Minerál (MPRM), Francisco da Costa Monteiro dehan, daudaun ne’e Governu kontinua konfirma tan prosesu atu dezenvolve Greater Sunrise (GS), iha Timor Leste (TL).
“Estudu ne’ebé ohin ita-bo’ot refere konsege konfirma dala ida tan, katak ita-nia hanoin no polítika loos hela atu dada kadoras la’ós téknika mak viavel de’it , maibé komersiál iha vantazen boot”, Ministru Francisco da Costa Monteiro, ko’alia ba jornalista sira, hafoin serimónia abertura kursu dalen inglés iha aldeia Sanfuk, ohin.
Ho nune’e prosesu atu dezenvolve GS, iha komersiál no iha vantazen bo’ot, tanba ne’e Timor GAP ho Autoridade Nasionál Petróleu (ANP) daudaun ne’e ko’alia hodi halo hela prosesu negosiasaun iha Austrália.
Governante ne’e dehan, projetu tasi-mane envolve Suai Supply Base (SSB), iha Covalima ho komponente no esplorasaun hanesan planu integradu atu harii indústria petrolífera bo’ot ba to’o iha Manatuto, Natarbora.
“Ita-nia planu balun asegura hanesan Greater Sunrise (GS), presiza halo; negósia ho Austrália ho empreza Wood Group no investidór Greater Sunrise atu konvense sira, nune’e aban bainrua mai harii kadoras, refinária planta LNG no petro-kimíka iha ita-nia rai”, nia dehan.
Antes ne’e, Timor Gas no Petróleu, Empreza Públika ( Timor Gap, E.P) ho empreza Wood Group asina ona kontratu atu hala’o estudu viabilidade ba terminál importasaun Gás Naturál Likifetu (LNG).
Jornalista: Celestina Teles
Editór: Rafael Ximenes de A. Belo