DILI, 04 fevereiru 2025 (TATOLI) –Institutu Nasionál Seguransa Sosiál (INSS) hein dadus funsionáriu reformadu husi Komisaun Funsaun Públika (KFP) nune’e bele halo pagamentu.
“Funsionáriu reformadu to’o agora ita seidauk hetan dadus husi nível Ministériu sira ne’ebé mak ninia funsionáriu sira atu reforma, mas husi parte seguransa sosiál prontu atubele halo pagamentu no atendementu funsionáriu sira ne’ebé mak atu reforma. Purtantu dadus funsionáriu hira mak atu reforma ami hein de’it dadus husi KFP, no liña ministeriais sira ne’ebé submete dadus mai”, Prezidente INSS, Arlindo Pinto, dehan ba jornalista sira, iha nia knaar fatin Caicoli, tersa ne’e.
Prezidente INSS hatutan katak INSS prontu koopera no bainhira lista reformadu submete ona mai INSS nune’e bele halo pagamentu.
“Parte seguransa sosiál prontu atu halo pagamentu no ami hein de’it dadus husi liña Ministeriál para halo prosesu pagamentu,” nia dehan.
Antes ne’e, Prezidente KFP, Agostinho Letêncio de Deus, dehan, públiku idade reforma ne’ebé ho idade 60-resin hamutuk 4.752.
“Liga idade nian, totál funsionáriu públiku neʼebé ita rejista ne’e funsionáriu ne’ebé liu ona idade 60 até 89,” Prezidente KFP, Agostinho Letêncio de Deus, hateten.
Situasaun forsa traballu iha kontestu funsaun públika ba tinan-2023 nian, tuir dadus atualizasaun iha baze SIGAP KFP rejista funsionáriu permanente inklui ajente administrasaun públika ativu ho totál 39.380, neʼebé kompostu husi feto 14.115 no mane 25.265 no husi númeru ne’e funsionáriu permanente 33.004, ajente administrasaun públika 6376.
Jornalista: Osória Marques
Editór: Rafael Ximenes de A. Belo