iklan

EDUKASAUN, POLÍTIKA

MPRM loke kursu dalen inglés ba komunidade afetadu SSB iha Camenasa

MPRM loke kursu dalen inglés ba komunidade afetadu SSB iha Camenasa

Ministru Petróleu no Rekursu Minerál (MPRM), Francisco da Costa Monteiro. Imajen Tatoli/Francisco Sony.

COVALIMA, 03 fevereiru 2025 ( TATOLI)- Ministru Petróleu Rekursu Minerál (MPRM), Francisco da Costa Monteiro, akompaña husi autoridade Covalima hamutuk ho Komandante PNTL  halo abertura ba formasaun kursu dalen  inglés ba komunidade afetadu Suai Supplay Base, iha aldeia Sanfuk, Suku Camenasa, postu administrativu Suai, Munisípiu Covalima.

Ministru Petróleu Rekursu Minerál (MPRM), Francisco da Costa Monteiro dehan, programa loke kursu dalen inglés ne’e atu kapasita komunidade sira iha área ne’ebé afetadu hosi projetu tasi ka Suai Suplay Base iha munisípiu Covalima.

“Ami ho Timor-Gap hamutuk ho Autoridade Covalima  loke kursu dalen inglés tanba inisiativa ida-ne’e  no ita sei habelár tan iha fatin sira seluk bainhira projetu tasi-mane la’o nune’e joven no komunidade sira iha ona abilidade ko’alia ho dalen inglés”, Francisco da Costa Monteiro dehan ba jornalista sira iha Sanfuk, ohin.

Ho nune’e programa loke kursu dalen inglés,  bazeia ba  pedidu husi komunidade sira tán ne’e komunidade sira mak iha inisiativa organiza malu  konstrui uma ba kursu lian inglés ne’e iha Sanfuk.

MPRM loke kursu dalen inglés,  formadór  husi  AHHA mak hanorin,  tanba ne’e  joven no labarik sira ne’ebé mak iha inisitiva,  atu aprende dalen inglés no sira mós iha métodu hodi enkoraja  joven sira oinsá atu ko’alia dalen inglés.

Aleinde loke kursu dalen inglés iha Sanfuk , MPRM  mós ko’alia ona ho Prezidente Autoridade Munisípiu (PAM)  Covalima atu identifika fatin hodi loke tan kursu lian inglés iha nível munisípiu  nune’e joven sira tuir.

“ Ha’u kontinua enkoraja nune’e programa loke kursu dalén inglés bele la’o ho di’ak  no ami mós hanoin sei fasilita treinamentu iha área sira seluk hodi haree kona-ba projetu tasi-mane presiza ema ne’ebé mak iha skill (abilidade)”, nia realsa.

Prezidente Autoridade Covalima, Miguel Armada Cardoso mós hato’o agradesementu ba MPRM ne’ebé iha programa hodi loke kursu inglés ba komunidade iha aldeia Sanfuk, munisípiu Covalima.

“Ha’u-nia inan aman nia esforsu hodi konstrui uma ba kursu lian inglés iha aldeia Sanfuk  no ita hato’o agradese mós Ministériu Petróleu Rekursu Minerál iha hanoin hodi loke kursu dalen inglés”, nia reforsa.

Autoridade Covalima mós fó hanoin ba joven sira atu tuir kursu dalen inglés atu hakribi violénsia, aproveita tempu tuir kursu lian inglés hodi prepara aan nune’e ba futuru sei implementa iha servisu fatin ne’ebé iha instituisaun sira.

Responsavel kursu ba dalen inglés, Jorge Alves  esplika katak, loke kursu inglés iha Sanfuk ne’e sai ezemplu hodi hatudu ba ema hotu  tanba ne’e Autoridade Covalima mós iha ona hanoin atu tan kursu inglés ne’e iha fatin sira seluk.

“Ohin loron ita haree no halo ona inaugurasaun  maibé durante ne’e halo esforsu hodi buka tali-tahan, bebak no ai sira durante fulan ida ne’ebé prosesu konstrusaun sempre iha diskuti malu tanba atu loke kursu lian inglés”, nia informa.

Uma ba kursu dalen inglés iha Sanfuk ne’e ho medida 7×25 ne’ebé taka uza tali-tahan ne’ebé  komunidade afetadu sira mak servisu no iha loron 3 fevereiru ne’e halo abertura kursu ba dalén inglés.

Jornalista: Celestina Teles

Editór: Rafael Ximenes de  A. Belo

 

iklan
iklan

Leave a Reply

iklan
error: Content is protected !!