DILI, 03 fevereiru 2025 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, hateten Portugal komprometidu hakarak hametin kooperasaun iha área saúde militár.
Tuir Falur, kooperasaun iha área saúde militár ne’e importante tanba futuru Timor-Leste sei estabelese ospitál militár, tanba ne’e presiza haforsa kuadru kooperasaun saúde militár nune’e bele kapasita membru forsa armada.
“Ita fó agradesementu ba prezensa Xefe Estadu Maiór Jenerál Forsa Portugal tanba ita konvida nia mai para nia asiste ita-nia seremónia loron transformasaun FALINTIL ba FDTL ba dala 24. Nia mai ami rua mós ko’alia kona-ba kontinuasaun projetu kooperasaun sira ne’ebé entre forsa armada Timor-Leste nian ho Portugal,” Falur hateten ba jornalista sira hafoin hasoru malu ho Xefe Estadu Maiór Jenerál Forsa Portugal, Jenerál José Nunes Fonseca, iha Kuartél Jenerál F-FDTL Fatuhada, Dili, segunda (03/02/2025).
Jenerál F-FDTL ne’e hatutan katak Xefe Estadu Maiór Forsa Portugés hato’o nia kompromisu hodi fortifika no apoiu liután nasaun ne’e para fó asesoria ba formasaun saúde militár nian.
“Ita-nia rekursu saúde militár mós fraku. Sira balun ita foin forma ba médiku no ita atu halo ospitál militár liuliu administrasaun, tékniku espesialista sira-ne’e tenke iha para depois ita bele kobre,” nia afirma.
Falur mós destaka ba Xefe Estadu Maiór Jenerál Portugal kona-ba kontinua fortalese treinamentu militár entre Portugal ho F-FDTL iha futuru.
Reforsa kuadru kooperasaun iha área defeza
Hafoin hasoru malu ho Tenente Jenerál Falur, Jenerál José Nunes Fonseca kontinua bá hala’o enkontru ho Ministru Defeza Kontra Almirante, Donaciano Costa Gomes “Pedro Klamar Fuik” hodi ko’alia kona-ba reforsa kooperasaun iha área defeza.
“Onradu ba ha’u ohin marka prezensa iha-ne’e no ha’u-nia vizita ne’e hakarak kongratula Timor-Leste ne’ebé mak bá ona dalan evolusaun. Okaziaun ida-ne’e hakarak afirma kontinua hametin kooperasaun ho Timor-Leste liuliu iha kooperasaun militár,” nia konklui.
Jornalista: Natalino Costa
Editór: Xisto Freitas da Piedade
