iklan

HEADLINE, SAÚDE

Tempu badak, SNAEM apoia ambulánsia ba Prezidénsia Repúblika

Tempu badak, SNAEM apoia ambulánsia ba Prezidénsia Repúblika

Ministra Saúde, Elia dos Reis Amaral, kondus kareta ambulánsia tula Ministru Estadu Negósiu Estranjeiru Japaun, TAKEI Shunsuke, iha Ministériu Saúde Caicoli, Dili, foin lalais. (06/07). Imajen Tatoli/Francisco Sony

DILI, 04 fevereiru 2025 (TATOLI)—Tempu badak, Servisu Nasionál Ambulánsia Emerjénsia Médika (SNAEM, I.P), sei apoia ambulánsia ida ba Palásiu Prezidénsia Repúblika hodi tula kazu emerjénsia ruma iha área ne’ebá.

“Ohin, SNAEM bá hasoru Kaza Sivíl Prezidénsia Repúblika hodi diskute destakamentu ambulánsia permanente iha palásiu referidu nune’e asegura kazu emerjénsia iha ne’ebá. Apoia ambulánsia ne’e pedidu maihusi Prezidénsia Repúblika bá Ministra Saúde,” Diretór Servisu Nasionál Ambulánsia Emerjénsia Médika, Simplício Amaral de Deus informa iha nia kna’ar fatin, Caicoli, tersa ne’e.

Nia esplika katak kolokasaun ambulánsia ne’e la’ós ba de’it pesoál Prezidente Repúblika, maibé ba funsionáriu no mós komunidade ne’ebé hela besik iha área ne’ebá hanesan Kampung Alor, Bairro Pité, Bebora no Ai-tarak Laran.

“Ita sei koloka mós kondutór ida, koloka médiku ida no infermeiru ida atu hela halo servisu permanente iha ne’ebá,” nia konklui.

Servisu Nasionál Ambulánsia no Emerjénsia Médika  mós destaka ona ambulánsia ida iha Aeroportu Internasionál Prezidente Nicolau Lobato, hodi apoia ema sira ne’ebé mak mai husi rai-li’ur karik hasoru problema ruma bele hetan atendimentu lalais.

 Jornalista: Felicidade Ximenes

Editór: Xisto Freitas da Piedade

iklan
iklan

Leave a Reply

iklan
error: Content is protected !!