COVALIMA, 05 fevereiru 2025 (TATOLI)-Asosiasaun Defisiénsia Timor-Leste (ADTL), koordena ho organizasaun Klibur Dezenvolvimentu Sustentavel Timor-oan (KDESTO), Covalima, fahe koñesementu kona-ba Life Skills Basic Education (LSBE) ba adolesente no foinsa’e defisiénsia sira , iha Covalima.
“Ita fasilita formasaun LSBE tanba ita hetan apoiu husi UNICEF. Ne’ebé, ADTL hamutuk KDESTO organiza, kolega sira mai partisipa iha atividade ida-ne’e”, Koordenadór programa ADTL, Ablentinos Maria, hato’o iha nia diskursu, iha salaun Kovec Bairru- Costa, ohin.
Koordenadór programa ne’e dehan, formasaun ida-ne’e atu hasa’e koñesementu oinsá adolesente no foinsa’e sira hatene nia aan, kona-ba kualidade pesoál.
Formasaun ne’e hala’o durante loron haat; hahú loron 05 to’o 08 fevereiru hodi partilla matéria sira hanesan, matéria inkluzaun ho LSBE hodi ko’alia kona-ba meta no espetativa, hadomi aan rasik, hola desizaun no rezolve problema, abilidade interpersonál (interpersonal skill) no komunikasaun.
Iha sorin seluk, Diretór KDESTO Covalima, Alfredo dos Santos dehan, Ajénsia internasionál UNICEF fó apoiu liuhusi ADTL ne’ebé koordena ho KDESTO hodi fasilita formasaun ba adolesente no ba foinsa’e ho defisiénsia iha Covalima. Alvu partisipante iha formasaun referida mak alende husi eskola sira hanesan Tékniku Vokasionál Kristál, Eskola sekundáriu Jerál Públiku Suai, Eskola Bázika Ogues no EBC Ladi nune’e mós portadór defisiente sira.
“Ho nune’e KDESTO nafatin atu buka hatene formasaun ida-ne’e la’ís para de’it iha ne’e maibé presiza iha nia kontinuasaun relasiona ema nia kapasidade. Ho sira-nia kapasidade ne’ebé iha, sira bele koñese ida-idak nia aan; joven mak futuru ba nasaun Timor-Leste,” nia esplika.
Tuir ezekutivu ne’e, “Formasaun parte ida atu ajuda skill (abilidade) joven-sira barak la hatene nia aan rasik kona-ba sira-nia koñesimentu to’o iha ne’ebé liuhosi formasaun atu ajuda sira bele koñese sira-nia aan”.
Ema ho defisiénsia fíziku Baquita de Jesus konsidera katak partisipa iha formasaun kona-ba LSBE ne’e importante no bele aumenta sira-nia koñesementu nune’e kontinua hatutan ba kolega sira seluk.
“Ha’u sente formasaun ne’e importante ba ami nune’e atu hasa’e ami-nia koñesementu , tanba iha sosiedade ema barak hasai liafuan ne’ebé la dignu ba kolega sira ne’ebé ho kondisaun defisiénsia,” nia dehan.
Jornalista: Celestina Teles
Editór: Rafael Ximenes de A. Belo
