DILI, 05 Fevereiru 2025 (TATOLI) – Konsellu Ministru aprova projetu rezolusaun Governu, ne’ebé aprezenta hosi Ministra Solidariedade Sosiál no Inkluzaun, Verónica das Dores, kona-ba kriasaun Grupu Traballu Interministeriál ne’ebé responsavel ba elaborasaun Relatóriu Inisiál Timor-Leste iha ámbitu implementasaun Konvensaun Nasaun Unida kona-ba Direitu Ema ho Defisiénsia.
Ministru Prezidénsia Konsellu Ministru, Agio Pereira, hateten rezolusaun Governu ida-ne’e reafirma kompromisu Governu Konstitusionál Dasiak nian liuhusi promove inkluzaun no defende direitu ema ho defisiénsia, garante elaborasaun no submisaun relatóriu inisiál kona-ba implementasaun Konvensaun ne’ebé Timor-Leste ratifika iha fulan-Janeiru 2023.
“Dokumentu ne’e sei aprezenta medida sira ne’ebé Estadu adota ona hodi hametin inkluzaun no progresu ne’ebé alkansa ona iha área ida-ne’e, no tenke konklui iha fulan-Abríl tinan 2025”, governante ne’e dehan iha Palásiu Governu, ohin.
Grupu Traballu Interministeriál ne’e sei dirije no koordena husi Ministériu Solidariedade Sosiál no Inkluzaun no sei kompostu husi pontu fokál sira husi departamentu Governu nian oioin ne’ebé relevante.
Jornalista: Arminda Fonseca
Editora: Maria Auxiliadora
