DILI, 05 Fevereiru 2025 (TATOLI) – Ministru Prezidénsia Konsellu Ministru, Agio Pereira, informa Governu aprova ona projetu ualu ne’ebé aprezenta husi Ministru Obra Públika (MOP), Samuel Marçal.
“Ohin, Ministru Obra Públika aprezenta pakote ida projetu ualu. Nia husu Konsellu Ministru autoriza ezekusaun ba despeza ne’e atu konklui obra sira ne’ebé prioridade Governu nian. Ho nune’e Konsellu Ministru aprova duni atu ezekuta”, Agio Pereira hateten iha Palásiu Governu.
Nia esplika katak projetu ualu ne’ebé delibera hodi autoriza despeza ida mak instalasaun kaixa gabiaun iha mota Laklo, suku Berloik Alas Manufahi (P32), ho montante orsamentu $396.249,46. Rua mak konstrusaun muru protesaun gabiaun iha mota Bolobu, Samutuaben, Kailaku, munisípiu Bobonaru (P34), ho montante $532.503,81.
Projetu datoluk mak reabilitasaun estrada trosu ka seksaun entre Remexio no Laklo – pakote II (P36), ho montante 2.223.538; projetu seluk mak konstrusaun seksaun protesaun mota Naiboruk estrada Viqueque bá Beasu pakote I (P41), ho montante $429.792,11.
Projetu dalimak mak hanesan konstrusaun seksaun protesaun mota Naiboruk estrada Viqueque-Beasu – Pakote 2 (P42), ho montante $484.602,09.
Projetu daneen mak instalasaun liña transmisaun (voltajen média), distribuisaun (voltajen tun), transformadór no ligasaun rezidensiál iha suku Haupu, Asi–Manukatilete, Kairia, Riatoni-Lekidasi (P58), ho montante $637.190,35.
Projetu tuirmai mak instalasaun liña transmisaun (voltajen média), distribuisaun (voltajen tun/baixa), transformadór no ligasaun rezidensiál iha postu administrativu Ermera, suku Lauana (P59), ho montante $523.284,72.
No ikus mak instalasaun liña transmisaun (voltajen média), distribuisaun (voltajen tun/baixa), transformadór no ligasaun rezidensiál iha postu administrativu Ermera, Tidibesi, Taklela, Lalimlau-Sakubesilima (P61), ho montante $765.589,16.
Ministériu Obra Públika, Samuel Marçal, hateten projetu ualu ne’e tenke aprezenta iha Konsellu Ministru antes nia implementasaun. “Regra mak hanesan ne’e, nune’e ha’u la’o tuir de’it lei”, nia dehan.
Jornalista: Arminda Fonseca
Editora: Maria Auxiliadora
