DILI, 05 fevereiru 2025 (TATOLI)-Diretór Ensinu Báziku Sentrál (EBC, sigla portugés) 30 Agostu, Baltazar Barromeu, husu ba Ministériu Edukasaun (ME) atu aselera implementasaun uniforme nasionál escolar, tanba estudante la uniforme ne’e difisil ba dirijente sira atu kontrola.
“Ami to’o agora seidauk simu orientasaun husi Ministériu Edukasaun, tanba ne’e mak labarik sira 7⁰ anu ne’e sei mantein farda anteriór hodi hein desizaun Ministériu Edukasaun”, Baltazar dehan iha ninia knaar fatin, Komoro, kuarta ne’e.
Nia hatutan: “Sira la uniforme kontrola difisil uituan, se-bele Ministériu Edukasaun hatún ona desizaun, atu kompañia ka eskola mak aranja karik lalais uituan para labarik sira uza ona uniforme ne’e”.
Totál estudante ativu hamutuk 1.845, kompostu feto 909 no mane 936. Totál profesór 60, no iha profesór nain-3 mak tama ona idade reforma, sala iha turma 36 fahe bá turnu rua, dadeer no loro-kraik.
Sekretáriu Estadu Ensinu Sekundária Jerál no tékniku vokasionál, Domingos Lopes Lemos, hateten uniforme nasionál eskolár ne’e ninia modelu no kór ministériu prepara no lansa ona iha fulan kotuk, hein eskola sira sosializa ba inan-aman sira atu deside.
“Uniforme ne’e la signifika dehan Ministériu Edukasaun mak prepara, daudaun ne’e ita fó de’it nia modelu no nia kór, tun ba eskola sira profesór sira sosializa ba inan-aman sira, nune’e haree inan-aman sira-nia hakarak ne’e hanusa hodi deside utiliza, bainhira mak uza ne’e ita hatún ona despaixu ba eskola sira, ne’ebé la’o dadauk ona”, Domingos Lopes tenik.
Nia dehan, uniforme nasionál eskolár ba estudante sira husi Ensinu Pre-Eskolár (EPE), Ensinu Báziku (EB), Ensinu Sekundáriu Jerál (ESG) no Ensinu Sekundáriu Tékniku Vokasional (ESTV), lansa ona, nune’e eskola hotu iha territóriu tomak bele implementa.
Diretór Jerál Ensinu Sekundáriu Jerál, Deolindo da Crus, hatete ME iha ona tabela ba kustu farda, tanba ne’e farda sira ne’ebé suku ne’e sei la-liu $22 ba leten.
“Másimu mak $21, labele liu. Ida-ne’e presu ne’ebé ita regula, maibé depende ba família ida-idak, karik nia hakarak hena kualidade ne’e depende”, tenik.
Notísia relevante: ME lansa uniforme eskolár nasionál, PM prefere haree didi’ak
Jornalista : Osória Marques
Editora : Rita Almeida
