DILI, 05 Fevereiru 2025 (TATOLI) – Governu ezonera Elvira Manat husi kargu Sekretária Rejionál Finansa Autoridade Rejiaun Administrativa Espesiál Oekusi Ambenu (RAEOA) nian tanba abandona serbisu.
Ministru Prezidénsia Konsellu Ministru, Agio Pereira, informa katak ezonerasaun ne’e akontese tanba abandona serbisu dezde Novembru 2024, nune’e Prezidente Parlamentu Nasionál, Fernanda Lay, propoin ba Primeiru-Ministru, Xanana Gusmão, hodi lori ba Konsellu Ministru halo ezonerasaun.
Governante ne’e esplika katak ho rezolusaun Governu ne’e mós define katak Prezidente Autoridade RAEOA, Rogério Lobato, asume temporariamente ezersísiu kompeténsia finanseira autoridade nian to’o nomeasaun Sekretáriu Rejionál foun ba Finansa.
Antes ne’e, Prezidente Autoridade RAEOA, Rogério Lobato, lamenta ho Sekretária Rejionál Asuntu Finansa, Elvira Manat, tanba la tama serbisu husi Novembru 2024 to’o Janeiru 2025 no laiha karta justifikasaun.
Nia afirma katak bainhira sidadaun ida haknaar aan nu’udar funsionáriu Estadu, iha regra atu regula nia komportamentu, tanba hetan benefísiu husi Estadu hodi hetan saláriu kada fulan.
Dirijente RAOEA ne’e salienta katak kada tinan iha fulan-Dezembru ne’e taka konta, kuandu halo ona, ema sira-ne’ebé iha finansa tenke iha fatin, maibé Sekretária Rejionál Finansa nia husu hatama lisensa.
“Ha’u dehan labele, ha’u indefere nia pedidu, tanba agora fecho de conta. Ita boot tenke iha fatin hamutuk ho Sekretáriu Rejionál sira hotu. Ita-bele halo fecho de conta iha Oé-Cusse, maibé nia la mosu husi Novembru to’o agora, hodi halo atraza iha pagamentu. Loloos ita selu ona iha tinan kotuk, maibé tenke transfere mai fali, halo baralla iha sistema finansa”, nia realsa foin lalais ne’e.
Jornalista: Arminda Fonseca
Editora: Maria Auxiliadora
