DILI, 05 fevereiru 2025 (TATOLI)–Fundu Kontributivu Kombatente Libertasaun Nasionál ba tinan 2024 atinje ona milliaun $48.98-resin, ida ne’e la-inklui lukru.
“Ita halo komparasaun pensaun 27.000 atuál, sura ema sira kontribui 31.238”, Diretór Nasionál Pensaun no Subvensaun, Manuel dos Santos Araújo, dehan ba Tatoli iha nia knaar fatin, Komoro, kuarta ne’e.
Nia hatete, kuandu na’in rua simu pensaun martir mak sei fahe ba rua, kada ema kontribui $15 maibé ida de’it mak simu entaun kontribui $30.
“Milliaun $50-resin ne’e sura hosi janeiru to’o dezembru 2024, maibé fulan-janeiru tinan ne’e seidauk bele fó sai tanba sei iha prosesu hela”, nia informa.
Iha fatin hanesan Prezidente Konsellu Kombatente Libertasaun Nasionál (CCLN-sigla portugés), Vidal de Jesus Riak Leman, hatete fundu kontributivu veteranu ne’e planu harii banku ba veteranu sira hodi halo kréditu.
“Agora ami hetan ona lisensamentu no ami harii banku veteranu iha tinan ne’e. Ita garante fundu ne’e hodi fó kréditu fali ba ita-nia veteranu sira. Nune’e funan ne’e ita-nia banku mak hetan fali, Agora sira-nia osan tau iha BRI, Mandiri entaun ne’e ema mak hetan lukru. Ami hanoin nusa ita la harii banku”, Riak Leman dehan.
Nia hatutan kréditu ne’e livre ba veteranu sira hotu, tantu nia kontribui $30 ou lae. Maibé veteranu ne’ebé la simu osan fulan-fulan ne’e konserteza la hetan kréditu. Kréditu ne’e liu-liu ba sira-ne’ebé kaer projetu.
Notísia relevante: Fundu kontributivu Kombatente Libertasaun aumenta ona ba millaun $50-resin
Jornalista : Osória Marques
Editor : Rita Almeida
