COVALIMA, 05 fevereiru 2025 (TATOLI)–Organizasaun Klibur Dezenvolvimentu Sustentavel Timor-oan (KDESTO), Covalima, fó prióridade implementa programa lima hodi fasilita ema ho defisiénsia, iha munisípiu Covalima.
Diretór KDESTO Covalima, Alfredo dos Santos, informa, durante ezisténsia, KDESTO implementa ona programa sira hanesan, fó asisténsia sosiál, halo referál ba portadór defisiente sira hetan direitu ba subsídiu husi governu, fasilita hasai dokumentu legál, fasilita ema ho defisiénsia tuir kursu lian Inglés no formasaun ba líder komunitária sira.
“Ita fasilita hodi fó asisténsia sosiál foku ba ema defisiénsia sira-nia nesesidade liuhusi servisu hamutuk ho parseiru relevante sira hodi halo referál ba maluk defisiénsia sira. Foin lalais 2024, halo referal na’in-12 hodi hetan direitu husi Governu”, Alfredo dos Santos informa ba jornalista sira iha salaun Kovek. ohin.
Dirijente KDESTO Covalima ne’e esplika katak, fasilita ema ho defisiénsia hetan dokumentu legál hanesan Billeti Identidade (BI) ho Kartaun eleitorál (KE) no KDESTO hamutuk ho ADTL rekomenda EhD tuir formasaun dalén Inglés ba ema na’in-haat no apoiu nesesidade bázika iha postu sira.
KDESTO nafatin fasilita formasaun ba líder komunitária sira ho objetivu atu hasa’e sira-nia koñesementu hodi halo atendementu ba EhD ho dignu hodi refleta ba lema Objetivu dezenvolvimentu sustentavel (ODS) la iha ema ida husik iha kotuk.
“Ami hatene família mak sai autór prinsipál hamosu diskriminasaun, abandona no hasai termu ne’ebé la dignu ba nia oan EhD tanba ne’e formasaun ami-nia tarjetu (alvu) mak ba família defisiénsia no lidér komunitária” nia konsidera.
Tan ne’e Sosiedade sívil sira hakerek ona relatóriu sombra kona-ba situasaun EhD ne’ebé durante ne’e sente membru sira-nia difikuldade hodi haruka ona ba ON. Maske Governu rasik mós manda relatóriu ba ONU
“Ami hakerek ona relatóriu sombra ida mai husi sosiedade sívil li-liu organizasaun, atu haruka ba ONU atu rekolla situasaun EhD hasoru maske Governu mós manda relatóriu maibé relatóiu ida-ne’e organizasaun sira mak sente membru nia difikuldade”, nia dehan.
Ema ho defisiénsia fíziku, Baquita de Jesus, benefisiáriu ne’ebé Organizasaun Klibur Dezenvolvimentu Sustentavél Timor-oan (KDESTO ), Covalima rekomenda tuir formasaun dalén inglés iha AHHA (SOLS)
“KDESTO implementa programa molok ne’e sei fahe informasaun hafoin buka dalan oinsá atu ajuda ami atu asesu ba edukasaun hanesan ha’u. Sira ajuda ha’u hodi fasilita ha’u tuir formasaun dalén inglés no motiva ha’u atu kontinua ha’u-nia estudu”, nia rekoñese.
Jornalista: Celestina Teles
Editór: Rafael Ximenes de A. Belo
