DILI, 05 Fevereiru 2025 (TATOLI) – Sekretáriu Estadu Formasaun Profisionál no Empregu, Rogério de Araújo Mendonça, informa mate-isin traballadór José António Rebelo iha Koreia Súl sei to’o Timor-Leste, iha semana ne’e.
“Prosesu preparasaun ba mate-isin ita halo hotu ona, parte Diresaun Nasionál Empregu Estranjeiru mós halo ona kontaktu ho adidu traballadór atu lori fila mate-isin mai Timor-Leste”, governante ne’e dehan iha Palásiu Governu. ohin.
Tuir informasaun ne’ebé Tatoli asesu husi Gabinete Adidu Timor-Leste, iha loron 05 Fevereiru, ekipa Adidu Traballu hamutuk ho ekipa ne’ebé toma konta iha sala mortuáriu iha ospitál Daejon, iha Provínsia Gyeongido, área Hwaseon, haloot ona matebian José Antonio Rebelo nia isin hodi hatama ba kaixaun. Iha loron 07, sei lori bá aeroportu Incheon hodi transporta bá Singapura no iha loron 09 to’o iha Aeroportu Nicolau Lobato Dili pur volta tuku 7h00AM.
Bainhira mate-isin to’o iha aeroportu sei simu diretamente husi parte SEFOPE hanesan reprezenta Estadu hodi kontinua entrega matebian ba família.
Relembra katak matebian José Rebelo ba hetan asidente mota iha loron 01 setembru 2024 iha oras 07h00. Depoizde akontesimentu ne’e lori kedan vítima bá Ospitál Daejon hodi halo tratamentu saúde durante fulan haat no hakotu iis iha loron 18 Janeiru 2025.
Matebian moris iha Becora, iha loron 17 Jullu 1995. Nu’udar traballadór timoroan neʼebé bá serbisu iha Koreia Súl iha 08 Janeiru 2019 no hala’o knaar iha empreza SJ Family, iha Provínsia Gyeongido, iha área Pocheon.
Iha loron 16 Juñu 2022, nia muda fali serbisu bá empreza FR Koria, iha provínsia Chungchung-namdo Nonsan-si to’o hakotu iis.
Notísia relevante: SEFOPE esforsu lori fila mate-isin traballadór José Rebelo mai TL
Jornalista: Arminda Fonseca
Editora: Maria Auxiliadora
