LIQUICA, 04 fevereiru 2024 (TATOLI)- Primeiru-ministru, Kay Rala Xanana Gusmão husu ba joven sira atu kuda valór espirituál iha moris loroloron nian hodi kontribui ba hadi’a povu no nasaun tanba joven mak hanesan futuru nasaun nian.
Líder karismátiku hateten, joven mak futuru rai no povu Timor-Leste tanba ne’e presiza iha matenek no iha komportamentu di’ak hodi hatudu domin tomak ba rai no povu ida-ne’e.
“Hanoin didi’ak; matenek dalaruma ita estuda ita matenek ona lae. Matenek iha imi-nia hahalok, iha imi-nia komportamentu. Ha’u kontente haree imi joven barak iha ne’e, kontente ida-ne’ebe ho esperansa katak imi sei kaer rai ida-ne’e ho d’iak liután, fó domin tomak ba rai ida-ne’e ho domin tomak ba povu ida-ne’e, labele hanoin ba aan rasik,” Xanana hateten, hafoin partisipa selebrasaun misa solene padroeiru Parókia São João de Brito Liquiça, tersa ne’e.
Xefe Governu Kay Rala Xanana Gusmão hateten iha tinan 25 liu ba iha igreja liquiça iha masakre boot ida ne’ebé sakrifika liquiça oan barak mate tamba hakarak moris ho liberdade, ohin joven sira moris livre, tamba ne’e joven gora tenke hadomi rai ida ne’e ne’ebe hetan liberdade husi terus oi-oin.
Xefe Ezekutivu husu ba joven sira atu estuda maka’as no komporta aan didi’ak nu’udar joven hodi loke valór Kristaun nian No, joven labele fahe malu maibé hamutuk haburas unidade, responsabilidade no haburas valór sira ne’ebe lori rai no povu ne’e ba di’ak.
“Komprova didi’ak nu’udar joven aplika valór sira nu’udar kristaun ohin imi simu krizma hanesan konfirmasaun ida hahú kedas husi família, ba sosiedade tomak, ikus-ikus ne’e joven sira komesa lakon valores ispirituál lao la diak susar tebtebes, tanba ne’e tenke komprova didi’ak nu’udar joven hodi loke valór nu’udar Kristaun,” Primeiru-ministru IX governu konstitusionál fó hanoin.
Xefe Governu husu joven sira atu hamutuk haburan unidade haburas responsabilidade haburas komprimisiu no valor sira ne’ebe importante ba rai ida ne’e.
Líder nasionál ne’e énfaze, líder tuan sira loron ruma sei la iha no jerasaun foun sira mak sei kontinua. Tanba ne’e, ba joven sira, Kay Rala Xanana Gusmão apela joven sira atu prepara aan, kuda valór sira ne’ebe iha nune’e bele iha hanoin di’ak hodi kontribui ba hadi’a povu nia moris no dezenvolve nasaun iha futuru mai.
Jornalista: Anito Soares
Editór: Rafael Ximenes de A. Belo
