COVALIMA, 04 fevereiru 2025 (TATOLI)- Bazeia ba dadus gráfiku, entre janeiru no dezembru tinan-2024, Polísia Nasionál Timor-Leste (PNTL) Covalima, rejista kazu iha sistema kriminál hamutuk 229.
“Iha 2024 ne’e komandu Covalima, ita rejista kazu iha sistema kriminál PNTL hamutuk 229. ami rejistu no mós nia prosesu andamentu submete hotu ona ba Ministériu Públiku ne’ebé prosesu la’o hela depende delegasaun kompeténsia husi Ministériu Públiku”, Komandante PNTL Covalima, Superintendente Asistente, Inacio Amaral relata ba jornalista sira, iha Santa Rosa, ohin.
Kazu 229 ne’e kategoriza ho tipu kazu sira hanesan kazu ofensa, kontra bandu no kazu violénsia doméstika (VD) mak númeru aas rejista iha sistema kriminál komandu PNTL Covalima no mós kazu sira seluk ladun barak; rejista iha tolu ka haat hanesan kazu ameasa, omesídiu, suisídiu
Bazeia ba grafika kriminál, kazu ne’ebe rejistadu mai husi postu administrativu sira hanesan, postu Suai rejista kazu 91 ho (40%) , Tilomar kazu 80 (35%), Maucatar kazu 29 (13%), Zumalai 14 (6%), Fatululik ualu (3%), Fohorem haat (2%) no Fatumea tolu (1%).
Alende ne’e, rejista kazu krime PNTL mós sai kazu asidente trafégu karreta ho motorizada hamutuk 37. Husi númeru ne’e, kazu akontese barak iha Suai no sidadaun ne’ebé hetan asidente balun mate na’in-tolu, kanek kmaan 51 no kanek todan 21.
“Ita mós halo servisu hodi kontrola movimentu tránzitu ba sidadaun sira ne’ebé kontra lei kódigu estrada ita aplika koima hodi kontribui reseita ba kofre Estadu nune’e ita kontribui reseita hamutuk rihun $ 21-resin maibé selu ona ba kofre Estadu foin rihun $ 19 ne’ebé rihun rua-resin inflatór sira seidauk selu, maibé daudaun ne’e balun kumpri daudaun ona,” nia konklui.
Jornalista: Celestina Teles
Editór: Rafael Ximenes de A. Belo
