VIQUEQUE, 06 fevereiru 2025 (TATOLI)—Abitante suku Caraubalu, postu administrativu Viqueque Vila, munisípiu Viqueque entrega oferese rai gratuita ba Governu liuhusi autoridade munisipál no Servisu Edukasaun Munisipál hodi konstrui edifísiu eskola CAFE.
Xefe suku Caraubalu, João Pinto, hateten, durante eskola CAFE munisípiu Viqueque laiha edifísiu propriu ida-ne’ebé sai hanesan difikuldade ba eskola referénsia, nune’e okupa de’it edifísiu eskola Ensinu Báziku Sentrál (EBC, sigla portugés).
“Nune’e, ha’u foin lalais simu profesór sira-nia preokupasaun kona-ba edifísiu eskola, ne’ebé ha’u koordena ho rai-na’in sira iha Betu-Hun, hodi oferese rai atu konstrui edifísiu eskola CAFE. Iha prosesu koordenasaun ho rai-na’in sira aseita hodi oferese rai gratuita ho medida 80 x 150 ba Governu hodi konstrui edifísiu eskola CAFE. Kona-ba rai ne’e ha’u hamutuk ho na’in ba rai entrega direta ona ba Prezidente Autoridade munisípiu Viqueque, depois autoridade entrega tutan ba Ministériu Edukasaun (ME) hodi tau ba planu konstrusaun,” João Pinto hateten ba Agência Tatoli, iha suku Caraubalu, kinta ne’e.
Autoridade suku Caraubalu ne’e subliña, abitante oferese rai presiza aselera konstrusaun hodi profesór no estudante sira bele uza no hala’o ensinu aprendizajén.
“Ita-nia komunidade ezije aselera ona konstrusaun, tanba rai oferese ona. Ha’u nu’udár autoridade hakarak rekomenda ba PAM no ME aselera ona prosesu konstrusaun tanba eskola CAFE, eskola ida-ne’ebé ho kualidade no eskola ne’e la’ós foin eziste iha Viqueque,” nia dehan.
Nia dehan, rai ba eskola CAFE uluk mak laiha maibé daudaun ne’e komunidade oferese ona, presiza aselera konstrusaun iha tinan ida-ne’e hodi estudante Viqueque-oan sira bele uza ba prosesu aprendizajen.
Enkuantu, rai ne’ebé komunidade Caraubalu entrega ba Ministériu Edukasaun liuhusi autoridade munisipál ho medida nia luan metru 80 no nia naruk metru 150, ne’ebé lokaliza entre Kaenlulik aldeia Mamulac ho Betuhun aldeia Manehat, suku Caraubalu.
Na’in ba rai, Vírgilio de Araújo, hateten nia parte entrega rai ba Governu liuhusi autoridade munisípiu Viqueque ne’e ninia inisiativa rasik hodi konstrui edifísiu eskola CAFE.
“Ami mak inisiativa rasik oferese rai ba autoridade no Governu hodi konstrui edifísiu eskola CAFE. Ami oferese ho gratuita ba Governu la husu buat ruma. Tanba, ami hakarak eskola loke besik ami, atu ami-nia rai sai sidade nomós ami-nia oan sira hela besik no asesu ba eskola. Tan ne’e, mak ami oferese gratuita rai ba Governu hodi konstrui eskola iha ne’e,” nia hateten.
Nia hateten, husi estrada boot ba rai ne’ebé atu konstrui eskola CAFÉ distánsia kuaze metru 100, nune’e karreta ladún asesu ba fatin referida maibé ho konstrusaun eskola no ba oin karreta sei asesu ba Betuhun.
Iha fatin seluk, diretór Servisu Edukasaun munisípiu Viqueque, Julio Sakadura, haktuir komunidade Caraubalu oferese ona ba Autoridade munisípiu Viqueque hodi kontinua hein prosesu ba konstrusaun.
“Rai ita entrega ona ba PAM ne’ebé ita hein husi PAM no Ministériu Edukasaun bainhira mak halo konstrusaun ba edifísiu eskola CAFE iha tinan ida-ne’e ka tinan oin, ha’u seidauk hatene loloos,” nia hateten.
Notísia Relevante: Governu konstrui edifísiu eskola CAFE iha Lautém no Viqueque
Jornalista : Vitorino Lopes da Costa
Editór : Cancio Ximenes
