BAUCAU, 05 fevereiru 2025 (TATOLI)–Autoridade Protesaun Sivíl (APC-sigla portugés) durante fulan-janeiru 2025 rejista akontesimentu dezastre naturál hamutuk 12 iha munisípiu Baucau.
Komandante operasionál APC munisípiu Baucau, Francisco Viana Freitas, esplika husi númeru ne’ebé rejistadu kompostu husi dezastre naturál tipu insédiu no inundasaun ne’ebé hahú akontese inísiu to’o finde janeiru.
“Fulan-janeiru nian akontese hahú kedas iha loron 01 janeiru mak insédiu iha Fatulia, postu administrativu Venilale,” Komandante opersionál APC munisípiu Baucau informa ba TATOLI iha Vila Antiga, Baucau, kuarta ne’e.
Husi kazu 12 referidu kompostu husi insédiu uma-kain tolu ne’ebé enfrenta ahi han sira-nia uma rua iha postu Venilale, suku Fatulia ho kategoria todan no kamaan inklui iha suku Uma Ana Iko ne’ebé uma-kain ida enfrenta ahi han uma ho kategoria kamaan.
Enkuantu, uma-kain 10 enfrenta inundasaun kompostu husi uma ualu todan no rua kamaan. Akontesementu ne’e akontese iha suku Kampung Baru, iha postu Vemasse, hamutuk uma-kain haat no iha suku Triloka, postu Baucau Vila, hamutuk uma-kain neen.
“Bainhira dadus relata ona mai, ami diretamente fó apoiu emerjénsia,” Francisco Freitas akresenta.
Nia haktuir katak APC relata ona relatóriu bá nasionál maibé sei kontinua halibur dadus vítima sira hanesan identidade pesoál, kartaun eleitorál no imajen nune’e hein apoia materiál rekuperasaun hodi konstrui fali uma.
APC apela ba komunidade iha Baucau durante tempu udan no anin-boot atu kontinua prevene an husi dezastre referidu, liuliu evita hela iha fatin risku sira hanesan mota ninin, rai lolon no evita ai-hún boot sira.
Entretantu, tótal funsionáriu iha APC Baucau hamutuk 37 kompostu husi kargu xefia, pesoál administrasaun no pesoál operasionál ne’ebé maioria husi membru korpu bombeiru.
Jornalista: Natalino Belo
Editór: Xisto Freitas da Piedade
