BAUCAU, 06 fevereiru 2025 (TATOLI)—Autoridade suku Fatulia, postu administrativu Venilale, sei reabilita estrada dirasaun aldeia Uai-to-bono ba sede suku tinan ne’e, liuhosi Programa Nasionál Dezenvolvimentu Suku (PNDS).
Xefi suku Fatulia, Angelo Moises Pereira, esplika desizaun ne’e bazeia ba kondisaun estrada dirasaun aldeia referida ne’ebé konsideradu grave nune’e konsellu suku deside halo reabilitasaun tanba sei fasilita movimentasaun transporte no hakbesik distánsia estudante sira atu asesu bá eskola.
“Ami deside ona liuhosi reuniaun asembleia aldeia to’o konsellu suku, tanba tempu udan transporte difísil halo movimentasaun no estudante la’o ho distánsia dook,” Xefi suku Fatulia hateten iha Vila Nova, Baucau, kinta ne’e.
Angelo Pereira salienta, tuir planu, ekipa tékniku husi PNDS sei halo levantamentu dadus hodi halo kalkulasaun tanba maneira reabilitasaun estrada referida sei implementa cór nune’e evita estragu bainhira tempu udan.
Prosesu seluk ne’ebé presiza halo antes realiza atividade referida mak tékniku PNDS sei halo levantamentu dadus, dezeñu, kuotasaun, kontratu ho badaen no faze ikus implementasaun.
“Tuir tarjetu, iha fulan marsu ka abríl ita bele implementa ona,” Angelo tenik.
PNDS tinan ne’e iha suku Fatulia aloka orsamentu hamutuk rihun $48 ne’ebé sei implementa atividade regulár reabilitasaun estrada rurál dirasaun husi aldeia Uai-to-bono to’o sede suku Fatulia ho tótal distánsia kilómetru 2 resin.
Suku Fatulia hamutuk aldeia haat kompostu husi Bahadato, Osso-uaque, Uatulia-ana no Uai-to-bono ho tótal populasaun 2.721 husi uma-kain 688.
Jornalista: Natalino Belo
Editór: Xisto Freitas da Piedade
